Ibra leh Pep an inmil lo - Raiola

Swedish footballer chanchin ngah ve tak Zlatan Ibrahimovic agent Mino Raiola chuan PSG striker Ibra chuan Pep Guardiola laka phuba lak nan Real Madrid tan a sign ṭep thu a sawi.

Ibra leh Barca

Ibra hian kum 2009 khan a khelh mekna Inter Milan chhuahsanin Barcelona a zawm.

A manah hian Bar­celona-in euro maktaduai 46 an pe a, Samuel Eto'o an pe tel bawk.

Sweden captain hian Inter a cham chhungin match 88 khela goal 57 lai a khung vangin Ibra an lalut thei hi Barcelona fan-te an lawm a, Nou Camp-a Ibrahimovic tlangzarh a nih ṭumin fans 60,000 lai an pung khawm nghe nghe.

Amaherawhchu, fan-te beisei angin thil a kaltluang lo a, kha­tih laia Barcelona coach Guardiola leh Ibrahimovic te chu an inngeih lo nia sawi a ni a, he boruak hian Barca chhungkaw boruak a chhem alh nasa hle.

Buaina leh Ibra

Spain chanchinbu lar Marca-in an kawmnaah Mino Raiola chuan thil kaltawh chungchang hi sawichhuak nawn leh a. Raiola chuan, "Guardiola khan Ibra a lakluh theih­na turin a theihtawp a chhuah a, Barcelona-a a kal phawt chuan kawng engkimah a puih tur thu a sawi. Mahse, a lut ta chenga rei lo teah a be duh lo lehnghal ringawt a ni, " tiin Guardiola a dem.

Mino Raiola chuan boruak ṭha lo awm chhan chu Barca thiampuipa Lionel Messi an puh chungchang sawiin, "Khatih laia Barcelona's director of football Txiki Begiristain khan, 'Goal a khung tam tawk loh avangin Messi a lawm lo a, Zlatan hian a puih a ngai dawn a ni,' tiin min hrilh a, Ibra chuan kha kha a pawm thlap. Mahse reiloteah Txiki khan buaina a awm thu min hrilh leh a, Messi chu 'lone striker' anga a khelh a ngaih tawh thu sawiin khami hnu khan Guardiola-a'n Ibra kha a be leh tawh lo," a ti.

PSG striker Ibra hi Barcelona-ah hian season khat chiah a cham a, a cham chhungin match 29 a inlan a, goal 16 a khung.

Madrid a pem loh chhan

Raiola chuan, "Real Madrid-a khel turin Ibra hian theihna a nei a, player ropui tak a ni. Barcelona a chhuahsan dawn khan Real Madrid zawmna hun ṭha a nei a, mahse a zawm ta lo. A hnuah Carlo Ancelotti khan Real Madrid zawm turin a duh a, mahse Real Madrid director general Jose Angel Sanchez khan PSG president Nasser Al Khelaifi a bia a, a hlawhtling ta lo," tiin Swedish forward-in Real a zawm loh chhan a sawi.

Raiola chuan Ibra chuan PSG a zawm hnuin nasa taka hma a sawn thu sawiin, French champion team-ah hian a huntawp a hman a rin loh thu a sawi.

Ibra hian Paris Saint Germain-ah a season thum­na a hmang mek a, PSG tan vawi 83 inlanah goal 67 a khung tawh bawk.