Penalty : Gerrard-a'n Keane a luah lan dawn lo

Europa League-a Liverpool-in Besiktas an hneh ṭumin Steven Gerrard-a'n chakna goal khungtu Mario Balotelli chu penalty pet tura ruat Jordan Henderson a chuh luih avangin a sawisel a, midang zahna nei lo ang hialin a chhuah.

Amaherawhchu Gerrard hian season thara LA Galaxy tana penalty pet a tum a nih chuan Balotelli tactic hi a hman vel a ṭul dawn.

LA Galaxy coach Bruce Arena chuan, "Keane-a'n a hlah hma chu penalty a pet chhun­zawm zel ang. Ani hi kan captain leh kan penalty pettu a ni. Midang a ken theih thu min hrilh chauhin kan thlak ang," tiin Robbie Keane chu captain bakah penalty pettu a nih chhunzawm zel tur thu sawi.

USA coach hlui Bruce chuan, "Steve nen kan inhmu a, Los Angeles-a rawn kal a châk tawh takzet a. Chutihrualin Gerrard hian Liverpool-ah a ṭha thei ang bera career a tih tawp a duh a, chumi atan chuan a rilru zawng zawng a la pe phawt ang," a ti.