German khawtualah Atletico

Zanin dar 1:15 hian Bayer Leverkusen-in an khelmual Bay Arena-ah Spanish champion Atletico Madrid an mikhual dawn. German club leh Spanish club inhmachhawnna tur hi Champions League last 16 first leg a ni a, second leg hi March 17-a khelh leh tur a ni.

Head to Head

2010/11 UEFA Europa League group stage-ah group khatah an awm dun a, 1-1 in ṭum hnih an inhnehtawk. Hemi ṭum hian Jupp Heynckes-a enkawl Leverkusen chu group hmahruaitu an ni a, champion lai Quique Sanchez Flores enkawl Atletico erawh pathumna niin an tla.

Tun season-a Group D pahnihna Leverkusen hian last 16 knockout stage-ah chak an la nei lo a, an record siam ṭha turin Group A hmahruaitu Atletico lakah thawhrim a ngai khawp ang.

Sulhnu

Leverkusen hian 2002 Champions League final-ah Real Madrid an hneh lo a, khami ṭum kha chuan second round hi knockout stage a ni lo. Khami hnu khan ṭum thum last 16 a thleng a : 2013/14 - Paris Saint-Germain 1-6 agg, 2011/12 - FC Barcelona 2-10 agg leh 2004/05 - Liverpool FC 2-6 agg te lakah an mualpho.

Tun season-ah Leverkusen hian an khel­mualah match thum an chak a, vawi khat an chak lo. Spanish club lakah an khelmualah record chhuan tur a nei lo a, an record chu W6 D3 L5 a ni.

Atletico-in a vawi sarihna atan European Cup quarterfinal thlen an tum dawn. Nikuma pahnihna Atletico hian September 2013 aṭang khan Champions League khualmuala vawi kua an khelhah vawi nga an chak a, vawi khat chiah an chak lo. Away-a Bundesliga club laka Atletico record chu W5 D3 L7 a ni.

Team chanchin

German club Leverkusen-in defence laiah hrem vangin Omer Toprak an chhawr thei dawn lo a, chuvangin Grik defender Kyriakos Papadopoulos kawppui turin Croatian veteran defender Emir Spahic a ding ang.

German midfielder Lars Bender leh Croatian defender Tin Jedvaj te inhliam vangin an dinhmun a chiang lo a; defensive midfield-ah Simon Rolfes kawppui turin Gonzalo Castro a awm a rinawm a, Giulio Donati chu right back-ah a awm a rinawm.

Atletico Madrid erawh an dam kimah a ngaih theih a, midfielder Koke leh Tiago te a ṭul dan a zira hman luih theih an ni. Tun hnaiah Mario Mandzukic leh Antoine Griezmann te tlar hmaah an inkawp rem chho a, Fernando Torres-a'n starting eleven a chan phak a rinawm loh.

Khelh dan tura beisei

Bayer Leverkusen (4-2-3-1) : Leno; Wendell, Papadopoulos, Spahic, Donati; Castro, Rolfes; Son, Calhanoglu, Bellarabi; Drmic.

Atletico Madrid (4-4-2) : Moya; Juanfran, Miranda, Godin, Siqueira; Turan, Gabi, Suarez, Niguez; Griezmann, Mandzukic.

A chunga tarlan ang hian khel ta se, Bayer Leverkusen player hi chawhrualin kum 24.9 an ni a, an san zawng hi 181.8 cm a ni. Atletico Madrid player-te kum chawhrual hi 27.7 a ni a, an san zawng hi 183 cm a ni thung.

Eng nge an sawi?

Atletico goalkeeper Miguel Angel Moya chuan, "Champions League hi chu engtik lai pawhin a danglam bik a, kan ngai pawimawh a ni. German club kan hmachhawn dawn a, a awlsam dawn lo. Attacking player ṭha tak tak a an nei a, [Hakan] Calhanoglu hi freekick pet thiam tak a ni. Kan team ang bawkin an phur dawn a, result ṭha tak nen first leg kan zawh theih ka beisei," tiin a sawi.

Bayer Leverkusen's director of sport Rudi Voller chuan, "Coach leh player-te kan ringtawk a, result ṭha tak min neih pui theih ka beisei," tiin a sawi.

Leverkusen hian kuminah Bundesliga-ah vawi khat chiah chak an la nei a, Atletico laka result ṭha neih hi team inrintawk nan a pawimawh takzet.