Kumtharah kan ṭha zawk ang - Galliani

AC Milan chief exe­cutive Adriano Galliani chuan an club chu tun sea­son aia season thara an ṭhat a rin zawk thu a sawi.

Milan hian an mana­ger hlui Clarence Seedorf aiah beiseina sangtak nen an player hlui Filippo Inzaghi chu coach atan an ruai a, mah se beisei ang result an nei thei chuang lo.

Inzaghi hian Milan tan kum 2001-2012 chhung khan a lo khel tawh ṭhin a, a club tan hian game 466 khelin goal 179 a khung bawk. Inkhelh a chawlhsan hnuah kum 2014 aṭang khan Milan hi a enkawl zui a ni.

Galliani chuan, "Kartawp a Cesena kan hneh khan inrintawkna min pe a, kan khelh hmabak game thum velah hian kan chak zawn thei a nih chuan kan beisei a sang tawh khawp ang. Season tharah chuan squad ṭha zawk nen kan khel thei tawh ang a, kumin aiin kan ṭha zawk hle ang tih ka chiang," a ti.

Tun season-ah Milan hian league game 24 khelh tawhah point 33 hmuin table-ah pakuanaah an awm mek a, Champions League khel turin table-a pathumna Napoli an phak lohna chu point 15 lai a ni tawh a, Europe-a inelna sang ber hi an khelh theih a beiseiawm tawh loh.