Gayle-a'n West Indies a chakpui

West Indies opener Chris Gayle chuan nimin khan World Cup chanchina run 200 siam tling thei hmasa ber dinhmun a hauh a, ball 147 a hmachhawnah run 215 a vawchhuak. West Indies hian over 50-ah run 372 an siam a, wicket hnih chiah hlohin run 73 in hnehna an chang.

Zimbabwe chuan an target sang tak run 378 hi umin an theihtawp an chhuah a, an batsman te'n khel ṭha thawkhat viau mah se an bowler-te khelchhiat leh West Indies batsman-te khelh ṭhat an tuar. Over 44.3-ah an vaia out vekin run 289 an tlin thei hram.

Gayle hian ball 138 a hmachhawnin run 200-a siam tling tawh a, ODI chanchina run 200 siam tling tura ball hmang tlem ber a ni. Chris Gayle mai bakah hian Marlon Samuels pawh a che ṭha a, ani hian ball 156-a hmachhawnah run 133 a siam.

West Indies run siam zat 372 hi Gayle nen chauha an hlap chhuah a ni a, ODI bika partnership run siam tam ber an ni.

Gayle hi Indian player ni lo zinga run 200 siam tling thei hmasa ber a ni bawk. India cricketer ropui Sachin Tendulkar chu run 200 siam tling thei hmasa ber a ni a, kum 2010-a South Africa an tum ṭumin 200 a lo tlin tawh a ni. Sachin bakah hian Virender Sehwag chuan kum 2011 khan West indies lakah run 219 a lo siam tawh a, kumin World Cup-a India opener Rohit Sharma chuan 2013-a Australia an tum ṭumin run 209 a siam a, kum 2014 khan Sri Lanka nen an intum ṭumin run 264 a siam tawh bawk.