Santosh Trophy Vawiinah chhuak dawn

India ram state hrang hrang tana football inelna sang ber Santosh Trophy Final Round chu March 1, 2015 aṭangin Punjab-ah khelh ṭan a ni dawn. Mizoram aiawha khel tur player 20 chu nimin khan Mizoram Football Association-in a puang a, vawiinah Lengpui Airport aṭangin an zin chhuak ang.

Qualifier chu

Santosh Trophy final round khel turin a thlengtu Punjab leh champion lai Mizoram pawhin qualifier an khelh a ṭul. Mizoram hian Assam-ah qualifier an khel a, Meghalaya (3-0) leh Tripura (2-0) hnehin final round an lut.

Mizoram tan H. Lal­muankima'n goal hnih a khung a, Joseph Lal­nunpuia, Samson Ram­engmawia leh Mal­sawmfela te'n goal khat ṭheuh an khung bawk.

Qualifier-ah team 33 (state, union territory, Railways leh Services) te chu zone ngaah ṭhen darhin zone tin aṭangin team hnih ṭheuhin final round an lut.

Final Round chu

March 1-15, 2015 inkar hian Punjab-ah final round khelh a ni dawn. Champion lai Mizoram hi Group B-ah awmin Delhi, Goa, Kerala leh Railways-te nen an awm a; Group A lamah a thlengtu Punjab bakah Assam, Maharashtra, Services leh West Bengal-te an awm.

Vawi khat ṭheuh an inkhelh kual hnuah group-a a sang pahnih ve vein semifinal an lut ang.

Mizoram awmna Group B hi a awlsam dawn lo, Mizoram hi champion lai an ni a, Railways hi nikum finalist an ni. Goa leh Kerala hi India rama footballer ṭha kawltu state an ni a, hetia en mai chuan Delhi hi nêm deuh tura ngaih an ni.

Mizoram Team chu

2015 Santosh Trophy Qualifier-ah Mizoram champion ṭuma captain Zico Zoremsanga leh a kawppui F. Lalrinpuia te an awm lo a, final round-ah an tel tawh. Forward ṭha pahnih bakah hian Chanmari West keeper Lalruatpuia, nikum lama vice captain V Lalṭanpuia leh Police defender Lallawmzuala-te'n an belh bawk a; Ricky Lallawmawma chu inhliam vangin a kal thei dawn lo.

Player panga ngawt thlak danglam a nih chhan hi inhliam vang leh team tihchak tum vang a ni.