Scholes entawn duhtu - Herrera
Nipui transfer laia Manchester United zawmtu Ander Herrera chuan United legend Paul Scholes aṭanga inzir zel a tum thu a sawi.
English midfielder Paul Scholes hian Manchester United tan 1994 aṭang khan khel ṭanin match 718 khelhah goal 155 a khung.
Spanish midfielder Herrera chuan, "United history-ah Paul Scholes hi midfielder ṭha ber a ni hial ang. Manchester United-ah hian Ander Herrera nih ka duh a, Paul Scholes aṭang hian inzir ka duh a, chutiang bawkin Michael Carric leh Wayne Rooney-te hnen aṭangin inzir ka duh bawk. Fan-te ngaihsan nih hi ka duh a, chumi tur chuan thawhrim a ṭul tih pawh ka hria," a ti.
Athletic Bilbao midfielder hlui hian United tan vawi 18 a inlan tawh a, goal nga a khung tawh a; inhliam vangin inlan tam tawk lo.
Kum 25-a upa Herrera chuan, "Manager-in khel tura min duh chuan ka inpeih reng. Chutihrualin bench-ah ṭhu tura min tih chuan ka ṭhu mai ang. Professional player ka ni a, United tana ka khel thei hi ka lawm a, team ṭhatna hi ka duh ber a ni," tiin a sawi.