Suarez tel loin kan ṭha zawk - Allen

Livepool midfielder Joe Allen chuan Uruguayan forward Luis Suarez-a tel lo a an ṭhat zawk thu a sawi.

Liverpool-in season bul an ṭan fuh loh avangin sawisel an hlawh a, mah se tun hnaiah erawh result ṭha bakah inkhel hmuhnawm an phochhuak. Brendan Rodgers-a team-te hian point 45 hmuin table-ah parukna an awm.

Joe Allen chuan, "Season bul kan ṭan dawn khan mi tam takin kan club-ah rinna an nghat ngam lo, a chhan chu Suarez a chhuah vang a ni. Mahse tunah chuan a tel loin kan ṭha tawk tih kan lan tir tawh. Player inhliam tam vangin season bul kan ṭan ṭha tawk lo a mah se tunah chuan hmalam kan pan leh tawh e. A sang thei ang ber thlen kan tum ang. Player pakhat vangin club hi a chhiain a ṭha thut thei lo," tiin Suarez tel lo pawha Liverpool an ṭhat tawk thu a sawi.

Liverpool hian an striker rinrawl Suarez-a chu nikum khan pound maktaduai 75-in Barcelona-ah an hralh a, an goal thun khawl ber an hralh avang hian goal thunah harsatna an tawk zui niin a lang. Tun season-ah goal 38 chauh la khungin goal 29 an chhuah tawh thung.

Suarez hian Liverpool tan hian kum 2011-2014 chhung a khel a, English club tan hian game 110 khel hmanin goal 69 a khung hman. Season hmasa khan Premier League-ah goal 31 lai a khung a, Catalan club tan tun season-ah goal li chauh a la khung thung.