Wenger-a'n a club hlui a hmachhawn dawn
Zanin dar 1:15 hian Champions League last 16-ah Arsenal manager Arsene Wenger chuan a club hlui AS Monaco chu Emirates Stadium-ah a lo mikhual dawn.
Arsenal leh Monaco te hi season ṭan dawn khan Emirates Cup-ah an lo in hmachhawn tawh a, Radamel Falcao goal khat thun hmangin Monaco an lo chak tawh a ni. Team pahnihte hi European competition-a an vawi khat inhmachhawnna tur a ni ang.
Damlo an tam
Arsenal tan hian player pawimawh Mikel Arteta, Abou Diaby, Alex-Oxlade Chamberlain, Aron Ramsey leh Mathieu Debuchy te chu inhliam vangin an khel thei dawn lo. Anni bakah hian hrem vangin Mathieu Flamini leh Nacho Monreal te hrem vangin an khel thei lo ang. Monaco pawhin inhliam vangin Tiemoue Bakayoko, Ricardo Carvalho, Joao Moutinho leh Andrea Raggi te hrem vangin an chhawr thei bik lo ang.
Tunge inlan dawn?
Arsenal tan tunlaia khel ṭha tak Oliver Giroud a pawimawh ang. Ani bakah Chilean forward Alexis Sanchez leh player fing Mesut Ozil te an intlar tura ngaih a ni a. Game kaihruai turin Spanish midfielder Santi Cazorla a pawimawh ang.
Monaco hian thlasik laia an player lak thar pahnih Matheus Carvalho leh Alain Traore te chu squad-ah an dah lut tawh a, an chhawr ngei pawh a rinawm.
Hmanah chuan...
Monaco hian 2003-04 season-a Champions League quarterfinal an thlen bak kha an thleng nawn leh tawh lo a, last 16 an khelh hnuhnung ber pawh 2004-05 season daih tawh kha a ni. Kumin hian last 16 a tawp mai hi an tum bik lo ang.
Arsenal hi Champions League last 16-a an vawi 15 inlanna tur a ni a, record duhawm tak a ni. Amaherawhchu Wenger-a naute hian tun hnai season li chhung chu quarterfinal an thleng zo lo vek.
Tunlai boruak
Arsenal hian group stage-ah point 13 hmuin an group-ah pahnihna an ni a, Borussia Dortmund nen an point hmuh inang mah se head to head-ah a chhe zawk. An game hnuhnung berah Crystal Palce 2-1 in an hneh a, League table-ah pathumnaah an inhlangkai a, tun season-a an tawn san lai ber an tawng mek.
Monaco hian group stage-ah point 11 hmuin group hmahruaitu an ni. French league Ligue 1-ah kar tawp khan Nice chu 1-0 in an hneh ve bawk. League-ah point 43 hmu tawhin palina dinhmun an luah mek.
Wenger a hmangaih hmasa
Kum 65-a upa French manager Wenger hian tun hmain Monaco hi a lo enkawl tawh ṭhin a, kum sarih (1987–94) lai a enkawl nghe nghe. Hemi hnu hian Japan ramah kal in Nagoya Grampus a enkawl leh a, kum 1996 khan London club-ah hian kalin tun thlengin ala enkawl zui a ni.
Monaco a enkawl lai hian kum 1988 khan French league-ah a champion pui a, kum 1991 khan French Cup a chawi pui tawh bawk.
Arsenal boss Wenger chuan, "Kum tam tak liam hnuah ka club hlui ka hmachhawn leh dawna a mak danglam hle mai, football-ah chuan hetiang hun hi a in herchhuak ve fo reng a ni. Kan inkhelh turah hian chak zawk tur sawi a harsa hle - 50:50 a ni. Monaco lam hian goal ven an thiam a, kan tan goal thun a harsa deuh maithei, amaherawhchu goal thun ngei turin kan nawr dawn. Result ṭha tak kan neih theih ngei ka beisei," tiin a sawi.