Sindhu beiseina a tawp

PV Sindhu chu a zawna a vawi thum nan Olympic medal a la thei dawn ta lo, beiseina sang tak nen Paris Games 2024 hmachhawn mah se He Bing Jiao hneh loin last 16-ah a zinkawng a tawp.

Ningani zan inkhelah Sindhu hi Chinese nula He Bing Jiao lakah hian 21-19, 21-14 in a chak lo a, tun hma lama vawi 19 ngawt a lo hneh tawh lakah a tlawm ta si a, mellung ropui phun a tumna chu a hlawhtling thei dawn ta lo.

Tokyo leh Rio Olympic-ah te khan Sindhu hian silver medal leh bronze medal a lo la tawh, infiamna khawmpui liana a inlan vawi thum zinga pahnihah medal a lak tho avangin a sulhnu hi sawi nep theih a ni chuang lo ang.

Kum 29 mi Sindhu chuan, "Game khatnaah point 19 ka hmu chungin game ka la lo a, khatiang tawhah kha chuan vanneih leh vanduai kar a ni tawh, ka ṭum fuh loh ni ka tawng," tiin a sawi.

Sindhu bakah hian men’s doubles event lamah pawh India beiseina a tawp. Medal la phak tura beisei zinga mi Satwiksairaj Rankireddy leh Chirag Shetty te ṭangdun chu Malaysia aiawhtu Aaron Chia leh Soh Wooi Yik te hneh loin an tla.

Quarterfinal inkhel hmuhnawm takah Indian duo Satwik-Chirag te hi an ṭang thei viau a, mahse an khingpui Aaron Chia leh Soh Wooi Yik te hi world number 3 ni lai a ni a, a vannei zawkah ṭangin 21-13, 14-21, 16-21 in an chak.

Badminton huangah India beiseina erawh a la tawp vek bik lo. Mipa singles player Lakshya Sen-a chuan HS Prannoy chu 21-12, 21-6 a hnehin quarterfinal a lut, chak tur hian minute 39 chauh hun a mamawh a ni.

World championships bronze medallist Lakshya hian a match lehpekah chuan Chou Tien-chen a hmachhawn dawn. Sen-a hi world number 13 a ni a, a khingpui tur Chinese Taipei mi Chou Tien-chen hi number 11 a ni thung.