Biles tan gold medal parukna

Simone Biles chuan United States tan Paris Olympic neih laiah gold medal a hlawh chhuak leh ta, infiamna khawmpui lianah hian Rio Games-ah a lo che ṭha tawh bawk, gold medal a lak zat belhkhawm chu paruk a tliang tawh a ni.

American gymnast hian all-around gymnastics title a la leh ta a, tun inelna neih chhunga gold medal a lak vawi hnihna a ni, mimal inelna hma hian women's artistic team all-around huangah an ram a champion pui tawh bawk.

Bercy Arena-a inelna neihah hian Brazil nula Rebeca Andrade chu pahnihna niin, champion lai Sunisa Lee chu pathumna a ni thung - American mi pahnih inkarah South American mi a rawn tlazep tihna a ni.

Rio Games-ah khan Biles hian gold medal pali pawt a la, inelna hnuhnung Tokyo Games-ah khan a lakah beiseina sang viau mah se rilru lam harsatna vangin a inhnukdawk nual, a tawpah erawh silver medal pakhat a hlawhchhuak ta tho a ni.

Rilru leh taksa inpeih tak chungin Paris khawpui a pan thei tawh a, tunah chuan khawvelin amah aṭanga hmuh a duh leh chak ang ngei chu an hmu leh ta, medal dangin a la zui leh a nih pawhin a mak lo ang.

Olympian ropui berte zinga mi Biles chuan, "Mi ṭhenkhat hian infiammi ropui bik tia min sawi an awm ṭhin a, ṭhenkhat erawhin an ngaithlei lo hle thung. Mahse, mite min fakna hian phurna nasa tak min siamin ka chakna hnar a ni zawk," a ti.

Biles hian vawiinah 'Vault final' a hmachhawn dawn a, chumi hnuah 'Beam' leh Floor' te a la hmachhawn dawn bawk a ni.