Match 25 hnuah Swiatek a chak lo

Paris khawpuia tennis khelna hmun clay court-ah Iga Swiatek chu a tlawm ve ta, match 25 tehmeuh a chak zawn tawhna hmun ni mah se Zheng Qinwen hneh loin Olympic 2024 nei laia semifinal-ah a tla.

Ningani zan inkhelah seeded pakhatna Swiatek hi chak tura rinkai leh buk rit ni mah se, a khingpui Chinese nula lakah hian 6-2, 7-5 in a chak lo a, infiamna khawmpi lian berah Poland tan medal lak tum viau mah se a hlawhtling thei bik rih lo.

Kum 23 mi Swaitek hian tun hnai kum thum chhung chu French Open nomawi a chawi vek, clay court inelna lian an khelna hmunah bawk hian Paris Olympic an khelh avangin a buk pawh a rit, mahse beisei leh duh ang vekin thil a thleng thei bik lo a ni.

Zheng-i theihna erawh sawi nep chi a ni bik lo - season tir lama khelh zawh tak Australian Open-ah khan final a lut a, nomawi inchuhna inkhelah a vanduai zawkah a ṭang thung. Semifinal-ah chuan Donna Vekic a hmachhawn leh ang, ani hian Slovakia nula Anna Karolina Schmiedlova chu 6-4, 6-0 in a hneh ve bawk.