Ramhlun leh Chanmari an chak

Danny Lalduhawma enkawl Ramhlun Athletic-in goal an khung zel a, Lalsangzuala Hmar enkawl Chanmari pawh an chak zel. Nimin khan Ramhlun Athletic hian SYS FC chu 4-2 in an hneh a, inkhel hmasa zawkah Chanmari FC-in Sihphir Venghlun 2-1 in an hneh bawk.

1st Bn MAP Ground-a inkhelah SYS-in Stain Laltanfela hmangin minute hnihna lekah khung mah se Ramhlun Athletic-in first half-ah goal liin an chhang let a; Isak Vanlalpeka, Felix Lalruatsanga, Benjamin Lalnunpuia leh Richard Lalrempuia ten goal khat ṭheuh an khung.

Chanmari tan ISL leh I League-a tawnhriat nei ṭha player thar Isaac Vanmalsawma leh Vanlalduatsanga te bul an ṭantir a, chak turin vanneihna an mamawh thung. Sihphir Venghlunin Lalthanpuia hmangin an khung hmasa a, Chanmariin penalty leh goalkeeper tihsual hmangin Lalnunzama leh Lalnunzira te hmangin an lehthal.

Ramhlun Athletic leh Chanmari te hian hian match hnihah point ruk ve ve an hmu a, goal kua zet khung tawhtu Danny hote hi goal difference hmangin table chung berah an awm.