CYMA Volleyball 2024 : Seeded-ah inelna hnuhnung ber semifinalist

LBS Suzuki 23rd Inter Branch YMA Volleyball Tournament 2024 Ben Hawnna chu nizan khan CYMA general secretary Prof. Malsawmliana'n Central YMA Hall, Tuikhuahtlangah a nei a, Mizoram Volley Association president Dr Lalmalsawma Nghaka chuan fixtures hi a tlangzarh.

CYMA leh MVA buatsaih inelnaah hian mipa inelnaah team 73 an tel a, City branch aṭangin team 43 telin City branch pawn aṭangin team 30 an tel. Hmeichhe inelnaah City branch aṭangin 24 an tel a, City branch pawn aṭanga pali telin an vaiin 26 an ni.

Inelna hi August 5-17, 2024 chhung hian R. Dengṭhuama Hall, Mualpuiah neih a ni ang.

Fixtures chu

CYMA Volleyball-ah hian seeded siam a ni a, mipa inelnaah kum 2022-a semifinalist Hunthar, Khawhai, Chhinga Veng leh Zawlnuam Vengpui te chu seeded an ni.

Champion lai Hunthar chu Pool A-ah dah an ni a, final-a an hneh Khawhai chu Pool D-ah an awm. Team pahnih hi final-ah chauh an inhmachhawn thei ang. Khawvel, Kulkawn West, Ramthar Veng leh Maubawk te an vannei a, first round-a bye zingah an tel.

Seeded ni pha lo mah se Muanna Veng an ṭha dawn. Muanna Vengah hian Pro Volleyball-a TNT player Vanlalṭanchhana (Valbuanga), Sadrak Fanai, setter Lalliankima leh Peter Lalpekhlua te an awm a, champion rinkai zingah an tel dawn. Muanna Veng hi Zawlnuam Vengpui nen group khatah an awm.

Hmeichhe inelnaah pawh kum 2022-a semifinalist Bungkawn, Kolasib Diakkawn, Kanan leh Armed Veng South te chu seeded an ni. Champion lai Bungkawn chu group A-ah awmin an bye a, final-a vanduai Kolasib Diakkawn, chu group D-ah awmin team pahnih final-ah chauh an inhmachhawn thei ang.

Testimonial certificate

CYMA buatsaih inelnaah hian inelna boruak a sang ṭhin a, volleyball chauh ni loin football inelnaah pawh player ṭha inlak a hluar ṭhin hle. Branch YMA-in a pekchhuah Pem Lehkha leh Testimonial Certificate hmang dik tawk lo, an awm ṭhin.

CYMA Sports Sub Committee secretary Darremsanga chuan, "Khawi khuaa mi emaw kha Branch hrang hrangah eizawnna avangin emaw, zirna avangin emaw chhan dang ṭha tak avangin an awm thei a. Chung mite chu an awmna Branch-ah chuan mi ṭangkai tak tak, YMA member an nih anga mitthi ina tlaivar ṭhinte, thlan lai ṭhinte, hnatlanga kawng hrang hranga tha leh zung thawh a, Branch tana ṭangkai takte an ni hlawm.

"Hetiang tan hian Testimonial certificate hi hman tur a ni. Pem Lehkha hi chu an pem fel a, a chiang mai," tiin Testimonial certificate leh Pem Lehkha chu inelna hmachhawnna tur atana lak tur a nih loh thu Vanglaini a hrilh.

Darremsanga chuan sawi chhunzawmin, "YMA member-ten chhiatna leh harsatna lo thlen changtein mahni inphatsanin midangte ṭanpui nan an hun leh tha an seng ṭhin. Mizo Thil tha lamah pawh hlawh leh phut let nei hauh lovin khawtlang leh ram tan an che chhuak ṭhin a ni. Chutiang hunah chuan YMA member thalai rualte hi khawtlang leh ram tana thlamuanpui awm tak takte an ni ṭhin.

"Buaina leh harsatna te hmachhawn tur mai ni lo a, intihsiakna ṭha bei tura YMA member-te tana Volleyball Tournament Central YMA-in a buatsaih leh thei tur hi a lawmawm khawp mai a. Mizo thalai Volleyball ngaina tute tana Zofate Volleyball World Cup khelh turah hian Branch tel zawng zawngte ṭha taka khel ṭheuh turin duhsakna kan hlan a ni," tiin a sawi.

CYMA hian kuminah cricket inelna an buatsaih tawh a, volleyball inelna zawh hian chess inelna an buatsaih leh ang.