Silly Point : Mangṭha ka pu!
1990s chawhnu lam a ni a, cricket kan tui chho ve ṭan hle. Mohammad Azharuddin, Sachin Tendulkar, Ajay Jadeja te ho zingah chuan anni aia kum lama upat hmel daih zawk mi pakhat chu an dressing room leh an warm up leh practice-na vela an hotupa ber, TV a lang ve fo a awm. A sakhming chu Anshuman Gaekwad a ni a, 1997 leh 2000 inkar khan Indian Cricket Team head coach a ni.
A hring nun hmasa lam
Indian Test cricketer hmasa Datta Gaekwad-a fapa a ni a. Pafaa India jersey ha thei tlemte kan neih te zinga mi an ni. 70s leh 80s chhova India opening batsman a ni a, a kawppui Sunil Gavaskar anga skills leh technique nei ropui lo mah se, paukhauhna leh huaisennain a thungrul ve thung.
Khang hunlai khawvela fast bowler ho hrang lai, West Indies Andy Roberts, Michael Holding etc leh Australia Jeff Thomson, Dennis Lillee etc te ho laka huaisen taka an ball vawm lo hmachhawn a, ṭum tam tak India lo chakpui leh dinhmun him zawka lo dah tawh ṭhin pasaltha kan ti ngei ang. Ama ṭawngkam ngei hian a khelh ṭhin laia a strategy chu a chiang mai awm e. "Nat leh inhliam kha ka hlau vak lo, mahse out hma kha ka hlauh ber a ni," a ti.
India team coach
Hun te an lo liam a, inkhelh a chawlhsan hnuah, 90s a rawn inher a. Cricket chuan namen loin hma a sawn. Professionalism leh principle mumal nei zawkin BCCI chuan hma a sawn a ngai tih a hria. Tun hma zawnga manager leh part time coach ang deuha kal mai ṭhin Indian Cricket Team chuan 'professionalism' awmze nei zawk leh hma sawn lehzual tir tu chu Anshuman Gaekwad hi kan ti lo thei lo ang.
Khang hunlaia BCCI-in consultant-a a rawih Australia mi hrang Bob Simpson nen khan Indian Cricket Team leh BCCI domestic cricket kalphung hrim hrim kha, step sang zawkah an kaipui kan ti lo thei lo ang. A testimony atan khang hunlai a hrual Tendulkar, Sourav Ganguly, Javagal Srinath etc te hi an Chiang mai awm e.
Tunhnai
Cricket coach leh administration hna chi hrang hrangte a thawh zawhin. Indian cricket buai chiri lutuk leh eiruk, nihna leh fawng chelh inchuhna boruak chhe tak awm ṭhin chu Supreme Court-in Lodha hmangin an siam ṭhat tak hnu khan. BCCI Committee leh State tin Asst Committee awmdan tur te pawh chu a siam ṭha.
Chutah chuan office bearers panga leh elected member pakhat leh Comptroller & Auditor General of India aiawh pakhat leh cricketer aiawh mipa leh hmeichhia pakhat ve ve niin chung mi pakua te chu Executive Committee niin a sakhmingah pawh Apex Council tih vuah a ni a. Hetiang chiah hian State tin Association pawhin an zawm tur tih a ni.
Chu BCCI Apex Council hmasa berah chuan Indian Cricketers Association aiawha tel ve in. Tun term tharah khan a ṭhianpa Dilip Vengsarkar-a'n thlakin, amah Anshuman Gaekwad hian ICA lamah President post a chelh veleh ta thung. Keini active leh retired cricketer-te tan pa chan a chang a, cricketers leh India cricket hmasawn na atana thawh hlawk ber zinga mi a ni.
Anshuman leh kei
Meeting leh thil pawimawh chi hrang hranga kan inhmuh loh leh phone hmanga in be ve fo kan ni a. Mizoram leh North East la hnufual tak te hi a phak tawkin a ngaihtuah ve em em ṭhin a. Mr Ruata tiin mi hi a lo be mai ṭhin.
State dang leh Association changtlung zawk a ring lo miten dan a ngaih pawimawh viau laia, an ICA Apex Council Representative te an hman ṭangkai em em laiin, keini a PATHIAN nung bia inti leh Kohhran leh khawtlang rawngbawltu tena an kaihhruai Cricket Asst of Mizoram lama dan kan palzut lutuk erawh a ngaimawh ve hle ṭhin a, mimal tak pawn kan titi fo na a ni.
A hun tawp thleng khan Missionary tir chhuak ram Mizoram hi engtin tak maw min ngai ang te chu ka ti ta hnuhnawh. Engpawhnise heng chu hun danga la thailan leh turah khek ila.
Anshuman-a hoin players pension te chu BCCI lamah sual chhuah a ni a, tin hmalakna tur leh hmachhawp a la awm ṭeuh mai. Players medical insurance te, zângnadawmna te, an retired hnuah an hamthatna dawn ve tur etc chi hrang hrang te hi a kaihruaina hnuaiah kan su kaw ve zel chu a ni.
Kumin kumtir mai khan a pa (Indian Cricketer zinga damlai upa ber) chu a chan.
Hmaichhana kan inhmuh hnuhnung ber erawh kumin January thlaa Mumbai-a kan meeting ṭum kha a ni. Thla leh lawk hian kan schedule awmsaah chuan a chair-na hnuaia Bangalore a meeting leh tur kan ni nghe nghe. March thla aṭang khan thisenah cancer a vei tih hmuhchhuah a ni. London lamah te enkawl niin, WhatsApp group lamah te chuan a ngaihtuah awm loh thu leh ṭawngṭaina lo hriat ve reng a duh thu te a khat tawkin a rawn sawi ve fo.
A awka ka hriat hnuhnun ber erawh thla hmasa lam daih kha niin, minute nga vel chu London Hospital a aw chau tak chungin mi a la chhawn peih a. Dam leh thuai tura duhsakna leh kan ṭawngṭaina kan hriat thu te ka chah ve. Amaherawhchu vawi khat chauh kan pian a, vawi khat chauh kan thihna tur khawvelah hian a hun chu lo hmang tawp ve tain, tun July 31, 2024 khan chatuan ram min lo pan san ta a ni.
Ka pu kan inzui chhung rei lote khan in mizia aṭanga tumruhna leh tih tak takna te hi ka zir chhuak. I vei ber mai India cricket hmasawnna tur hi chu : sumdawng, politician, pensioner etc dinhmun leh nihna duh ho ni lo a, a cricketer ngei te hi an ni tih principle kha a rah a chhuah mek zel a, i damlai in a kuh mum hmu hman lo mahla, i chi theh hian nasa takin rah a rawn chhuah dawn tih i naute hian kan hmu lawk vek a ni. Thlamuang takin chawl lang che.
Mangṭha le, ka pu.