Nipui tranfser langsar - tu nge tifuh dawn?

Euro 2024 a zo a, football khawvelin transfer bazar lam a hawi lehnghal. Ṭum dang ang bawkin European football transfer chuan mipui ngaihven a hlawh a, Europe lam hawiin mipuiin an mit leh beng an chhi ṭhup a ni ber e.

Premier League leh La Liga hi August 31, zing dar 3:30-ah transfer khar a ni dawn a, zing dar 2:30-ah Ligue 1 nipui transfer khar a ni dawn bawk. League pathum aia hma hretin Serie A transfer khar a ni dawn a, August 30, zan dar 11:30-ah Italian top flight league transfer hi khar niin, Serie A hma hian Bundesliga a tawp dawn - zan dar 9:30-ah khar a ni ang.

Serhou Guirassy (Stuttgart - Borussia Dortmund)

Kum 28 mi Guirassy hian Germany leh France second division lama hun a hman hnuin, VfB Stuttgart a pan hnuah a hming a chher a, season hmasa khan league match 28-ah goal 28 a khung - minute 79 dana goal khung ziah ang a ni. Kum 2012 hnuah Bundesliga season khata goal khung tam lama a tluk loh chu Harry Kane, Robert Lewandowski leh Pierre-Emerick Aubameyang te chiah an ni.

Heti taka a che ṭha chung hian a man erawh a tlawm hle. Stuttgart hian an lei laia hriat hlawh lo striker hi pound maktaduai 15 leka a chhuah theihna dan an ziah tel pui pek a, hei hi Dortmund-in remchangah lain, an la lut hmak - Stuttgart defender Waldemar Anton chuan £19mtd-in Dortmund hi a pan ve bawk.

Robin le Normand (Real Sociedad - Atletico Madrid)

Euro 2024-ah Spain an champion a, an defender pawimawh chu Robin le Normand a ni. Real Sociedad centre back hian club thar nei zuiin, Atletico Madrid a zawm dawn a, a man hi £29mtd vel nia sawi a ni.

Kum 27 mi defender hi France-a piang niin, kum 2023 khan Spain khua leh tui nihna a nei a, European champion a nihpui zui. Sociedad tan vawi 221 inlanin, kum 2020 khan Copa del Rey a champion pui a, Trabzonspor pana chhuak Stefan Savic hmun ruak a luah amg.

Douglas Luiz (Aston Villa - Juventus)

Aston Villa-in season thara Champions League an khelh theihna tura player langsar chu Douglas Luiz a ni a, Brazilian defensive midfielder hian Juventus chu £42.35mtd-in a zawm.

Kum 26 mi midfielder hian Villa tan match 204 khelin goal 22 a khung a, amah ang thoa Villa-a khel a bialnu, Alisha Lehmann chuan Villa chhuahsanin, Juve hmeichhe team a zawm ve bawk - a bialpa zar a zo tiin a sawi theih a, hei hian Juve-in Luiz an duhzia a hrilhfiah bawk. Juve hian Nice midfielder Khephren Thuram chu £17mtd-in an la bawk.

Kylian Mbappe (Paris St-Germain - Real Madrid)

France captain Kylian Mbappe-a'n Paris St-Germain chhuahsanin Real Madrid a zawm a, kum 25 mi striker hi Santiago Bernabeu pan tura rin sa a nih avangin a Real pan thu hi a thawm nat tur angin a na lo zawk.

PSG-a kum sarih a khelh chhungin goal 256 a khung hman a, club top scorer a ni. Santiago Bernabeu khatin fans-in an lo lawm a, World Cup nomawi pawh chawi tawh striker hian season khatah £12.8mtd a hlawh dawn a, image rights aṭangin percentage chan tur a nei a, kum nga chhungin signing bonus £128mtd a dawng bawk ang.

Georges Mikautadze (Metz - Lyon)

Euro-ah Georgia tan goal thum khungin Georges Mikautadze-a'n a hming a chher a, a lawmman chu club thar a ni. January 2024 khan Ajax aṭangin Metz chu loan-in a zawm a, a ngheta lei theihna dan an ziak tel. Metz hian an lei ta ngei a, ni 18 hnuah Lyon hnenah an hralh zui!

Kum 23 mi striker hian Lyon hi €18.5mtd-in a zawm a, a man hi €23mtd thlenga sang chho thei tura tih a ni. Lyon-a piang leh seilian niin, youth team-ah a lo khel tawh. Lyon hi an ṭang hle - tun nipuiah Moussa Niakhate (£27mtd), Orel Mangala (£15mtd), Said Benrahma (£11.9mtd) leh Ernest Nuamah (£24mtd) te chu an lakluh tawh langsar zual an ni.

Alvaro Morata (Atletico Madrid - AC Milan)

World Class striker tia sawi vul chuk tur ni lo mah se, player langsar a ni ve thei reng a, club tenauah a la khel lo. Captain armband hreng chungin Spain chu Euro-ah a champion pui a, Atletico Madrid aṭangin AC Milan chu £11mtd-in a zawm.

Real Madrid leh Chelsea tan pawha lo khel tawh striker hian Juventus-ah pawh hun lo hmang tawhin, season li a lo khelhsak tawh. Hei vang hian Italian football-ah a mikhual lo a, season hmasaa goal 21 khungtu striker hian Los Angeles FC pantu Olivier Giroud hmun ruak hnawhkhah a tum ang.

Michael Olise (Crystal Palace - Bayern Munich)

Crystal Palace winger Michael Olise-a'n season tharah chuan Champions League a khel tawh dawn. Palace chhuahsanin Bayern Munich chu £50mtd-in a zawm a, German club tan an player man to palina a ni phak hial.

Olympic lama France tana inlan mek Olise hian hliam vangin match 19 chiah a khel a, mahse, goal 10 khungin, assist vawi ruk a nei a, Vincent Kompany enkawl Bayern-ah hming chher lehzual a tum ang.

Joao Palhinha (Fulham - Bayern Munich)

Bayer Leverkusen-in German football lalṭhutthleng aṭanga an petchhuah meuh chuan Bayern an ṭang hle. Fulham midfielder Joao Palhinha chu £42.3mtd-in an la lut a, a khelh ṭhat dan a zirin a man zat hi £4.2mtd-a la pung leh thei tur a ni.

Season hmasa ṭan hma khan Palhinha hian Bayern hi a zawm hman teuh hle. Mahse, Premier League club hian amah thlakna tur an tifel hman lo a, a chhuak ta lo - Bayern an rawn ri leh vat a, German club hlun a zawm ta.