Palace-in Sarr an la lut

Crystal Palace chuan winger Ismaila Sarr chu Marseille aṭangin pound maktaduai 12.5-in an la lut a, kum nga chhung atan contract an ziahpui.

Sarr hian season hmasa lawk khan Watford chhuahsanin Marseille a zawm a, French club-ah season khat hun a hman hnuin English football-ah bawk a kir leh ta - Marseille tan match 35 khelin goal nga a khung a, assist vawi ruk a nei bawk.

Senegal tan vawi 64 inlana goal 13 khungtu Sarr chuan, "Coach leh Sporting Director chungah lawmthu ka sawi. Palace tana an hmachhawpte min hrilh a, hmachhawp ṭha tak nia ka hriat avangin he club hi ka zawm a ni," a ti.

Eagles boss Oliver Glasner chuan, "Ismaila-a'n Crystal Palace zawm a thlang hi kan lawm hle - Watford tana a khelh laia Premier League lo hrechiang tawh a ni a, England boruak a tem tawh a, Marseille tan season duhawm tak a hmang bawk," tiin a forward thar a fak.

Glasner chuan sawi zawmin, "Sarr hian kum tinin, club a khelhna apiangah goal a khung thei tih hi a pholang zel - Senegal tan pawh a goal khung theihna a lo pholang tawh a, ani ang kan chang thei hi kan vannei a ni," a ti.

Palace hian Bayern Munich hnenah an player chhuanvawr Michael Olise an hralh a, £50mtd man player thlakna tur an zawn reng hnuah Sarr an la lut ta - Senegalese forward hma hian player pahnih an lo la lut tawh bawk.

Japanese midfielder, kum 27 mi Daichi Kamada chuan Lazio a chhuahsan hnuah, free transfer-in Palace a zawm a, Morocco tana vawi thum inlan tawh, kum 21 mi centre back Chadi Riad chuan Real Betis aṭangin £14mtd-in a zawm bawk - Palace an ṭang hle.