Dortmund-ah Pascal Gross a kal

Brighton & Hove Albion midfielder Pascal Gross chuan kum sarih zet a lo awm tawhna Brighton chhuahsanin, naupan lai aṭanga a club lo ṭan tawh ṭhin Borussia Dortmund a zawm a, German club-ah hian June 2026 thleng khel turin contract a ziak.

Dortmund hian Germany international manah hian pound maktaduai riat an pe a, a khelh ṭhat dan a zirin a man hi £10mtd thlenga sang chho thei tura tih a ni.

Euro 2024-a Germany tan inlan forward hian kum 2107 khan German club Ingolstadt aṭangin Brighton hi a zawm a, English club-ah a hming a chher hle - Premier League-ah goal 30 khung hmanin, Brighton tana Premier League-a goal khung hnem ber a ni.

Brighton tan inelna hrang hrangah match 261 khelin goal 32 a khung a, assist vawi 52 a nei bawk. English club hian Gross hi chelh duh viau mah se, German a nihna lo lang chhuakin an ram lama kir leh a duh - Dortmund tan a khel dawn ta.

Seagulls boss Fabian Hurzeler chuan, "Pascal kan chelh thei lo hi pawi ka ti takzet a, chutihrual chuan a dinhmun erawh ka hrethiam a ni. Germany-a club ṭha ber pawl zawm theihna hun ṭha a nei hi kan lawmpui a, a hma hun atan kan duhsakna sang ber kan hlan a ni," a ti a, a striker a thlah.

Gross hi Premier League-a Brighton an kir hnua an player lei hmasak ber a ni a, beisei ang ngeiin a thawhhlawk hle - club budget tlem tak ni mah se, season sarih chhungin an relegate miah lo a, English top flight league club an nih rengna kawngah Gross a langsar.

Kum 34 hnua top flight league-a Brighton goal hmasa ber pawh Gross-a khung hi niin, West Brom lamah a khung. Kum 32 mi a nihin a vawi khat nan ram tan koh a ni a, Euro-ah hial ram tan ai a awh zui.