Forest tana khel tur Jota Silva

Nottingham Forest chuan Portugal international Jota Silva an la lut a, kum li chhung atan contract an ziahpui. Kum 25 mi forward manah hian euro maktaduai sarih an inseng a, a khelh ṭhat dan a zira €6mtd pek belh leh tur a ni ang.

Portuguese top-flight club Vitoria aṭanga an lakluh player hian season hman zawh takah khan inelna hrang hrangah match 42 khelin goal 15 a khung a, Portugal boss Roberto Martinez chuan March thla khan a vawi khat nan Portugal tana inlan turin a ko hial a ni.

Forest chief football officer Ross Wilson chuan, "Portugal kalsan a, ka hnena chona thar hmachhawn tura lokal hi a phur hle a ni," tiin an striker chungchang hi a sawi a, English top flight league-ah a theihna tak tak fiahin a awm dawn.

Season hman zawh takah khan Forest hi Premier League table-ah 17-na niin season an khar a, relegation zone aṭangin an him chiah chiah - season tawpa hlauthawnga awm nawn lo turin ṭan an la nasa a, coach Nuno Espirito Santo-a'n squad thuam chhah a tum.

Serbian centre back Nikola Milenkovic chu kum nga chhung atan an lo la lut tawh a, a man zat hi tarlan ni chiah lo mah se, £12mtd vel ni tura ngaih a ni a, Newcastle United aṭangin midfielder Elliot Anderson an la bawk.

Kum 21 mi Anderson hian season hman zawh takah khan Magpies tan inelna hrang hrangah match 26 a khel a, assist vawi hnih a nei. A man zat hi £35mtd nia sawi a ni a, kum nga chhung atan contract a ziak.

Partizan Belgrade defender Marko Stamenic pawh la tawhin, ani erawh Olympiakos lamah loan-a kaltir zui niin, goalkeeper Carlos Miguel chu Brazilian club lar Corinthians aṭangin an la bawk - kum 25 mi defender man hi £3.4mtd bawr vel a ni.