Foxes boss hlui Shakespeare a thi

Leicester City manager hlui Craig Shakespeare chu kum 60 mi niin a thi a, October 2023 aṭang khan English coach hi cancer natna avangin enkawl a ni tawh.

League Managers' Association chuan Shakespeare aiawha thuchhuah siamin, "Thlamuang takin, a chhungte kianga awmin a nunna chu a thlah ta a ni. Keini a chhungte chuan, player leh coach a nihna anga a sulhnute kan chhuan em em rualin, kan tan chuan min hmangaihtu leh min ngaihsaktu kan pa, pasal, fapa, unaupa leh khaipa a nihnate kha kan hriatreng tur chu a ni," an ti.

LMA chuan mipuite chu hun harsa an tawh laia an chhungkaw dinhmun zahsak turin an ngen a, anmahni duhsaka, an pa ber sunna pholangtute chungah lawmthu an sawi.

Leicester City-in 2015-16 season-a Claudio Ranieri hoa league nomawi an chawi khan Shakespeare hi assistant coach a ni a, West Brom, Hull, Everton, Watford, Aston Villa, Norwich City leh England national team-ah te coaching staff zingah a lo tel tawh bawk.

February 2017 khan Foxes hi Ranieri ban a nih hnuah manager lailawkin a lo enkawl tawh a, June thlaah kum thum atan contract ziahpui mah se, October 2017-ah an ban zui. Player a nih laiin Walsall, Sheffield Wednesday, West Brom, Grimsby, Scunthorpe, Telford leh Hednesford tan a khel tawh.