Antonio Conte a chhuak dawn lo

Inter Milan chuan an manager Antonio Conte a chhuak dawn lo tih an sawi a, season tharah pawh Italian manager kaihhruaina hnuaiah an khel chhunzawm dawn tih a ni - a thlen chin aṭanga hmasawn erawh an tum ang.

Thawhlehni zan khan Conte leh Inter president Steven Zhang te an inbia a, club chuan thu lawmawm an sawi thu an tarlang. Inter chuan, "Inbiakna chu a kaltuang a, hmasawnna tur lam sawi a ni.

"Coach leh club thuneitu lam hian eng tiangin nge hma kan sawn ang tih leh hna thawh dan tur an sawi," an ti. Conte hian a contract neih lai la hmang zo lo mah se chhuak tur angin thawm a nei fo a, an buaina chu chinfel a ni dawn niin a lang.

Conte a nghet lo nia sawi a nih lai khan amah thlaktu tur hming a ri ngal nual, an zingah hian Massimiliano Allegri pawh a tel. Allegri hi Turin club Juventus-a Conte thlaktu bawk kha a ni a, San Siro-ah erawh a sulhnu a chhui dawn rih lo.

Juventus leh Chelsea ten Serie A leh Premier League nomawi a chawi a, khawvel manager ṭha zinga mi a ni. Inter Milan hian beiseina sang tak nen an lalut, nasa takin hma sawn pui mah se a hmawr an bawk fuh tawk lo.

Conte-a'n player lakluh nan sum a hmang hnem a, khelmual chhungah an ṭhatpui ni pawhin a lang. Serie A-ah pahnihna niin champion Juventus an phak lohna chu point hnih chauh a ni, hriat tel ngai erawh Juve hi khelh hmabak pahnih nei chungin an champion tawh.

Italian manager hian league nomawi an lak loh hnuah pahnihna nih chu atan awmzai a awm loh thu a sawi. Boruak neuh neuh nei chungin Europa League final an khel a, an khingpui Sevilla hneh loin pahnihna bawk an ni.

"Buaina chinfel ngai a awm a, hmai chhana sawifel a ngai. Mahse club president ber chu China-ah a awm daih si," tiin Conte-a'n harsatna an neih thu hi ualau takin a sawi. A duh ang ngeiin club hotupa nen pawh an inhmu ta reng a ni.

Conte hian a duh ang player lalut turin sum tam zawk a mamawh nia sawi a ni a, club boruak siamṭha turin thuneitu lam aṭanga thlawpna ṭha a duh thu a sawi tawh bawk - president nen an indawrna hi chipchiar taka pho chhuah ni lo mah se Conte duhdan hi an tih hlawhtlinsak dawn niin a rin theih.

Kum 2022 thleng daih contract neitu hian a duh ang player lalut chunga season thar a hmachhawn a nih chuan a lakah beiseina a sang zual dawn a, tun hma lama a sawi tawh angin pahnihna nih chu awmzia a awm lo ang - Inter fans leh thuneitu lamin nomawi chawi ngei an duh dawn.

Season kua zet chu Juventus rorelna hnuaiah Serie A a awm tawh, Old Lady hian Maurizio Sarri duh khawp loin an ban - a hmunruak luah turin Andrea Pirlo an lalut, an manager thar hi team enkawl lama tawnhriat la nei lo a ni.

Manager bik khaikhin chuan Conte tan Pirlo hi elpui hautak tur niin a lang lo. Mahse Conte chuan team a din mek a, a khingpui tur Pirlo erawhin Cristiano Ronaldo awmna team nghetsa a chhawm thung.

Pirlo hian Juventus player a nih laiin Serie A nomawi pali a chawi, heng zinga pathum chu Conte kaihhruaina hnuaiah a ni. Tunah chuan player leh coah ni chunga thawkdun tawh kha champion tum coach ve ve niin a inelna ber an ni dawn.