Serena Williams a tla

US Open inbuatsaih nana hman Western and Southern Open khelh laiah Serena Williams chu nimin zing khan a chak lo. American star hi Maria Sakkari lakah 5-7, 7-6(5), 6-1 a chak loin a zin kawng a tawp.

Kum 38 mi Serena hian bul a ṭan fuh hle, set hmasa berah phei chuan 5-2 in hma a hruai fal hman - mahse a in nih rual tir leh hman; set hnihnaah pawh a che fuh hmasa zawk a ni.

Mahse Greek nula Sakkari a zam duh bik lo, set khat ve ve an lak hnuah a tlang zawk tur chinfel a ngai. World number 21 Sakkari hian set hnuhnung berah chuan 5-0 ngawtin hma a hruai fal ve thung a, game khat chauh hloh chungin set a la.

Sakkari chuan, "Ka tan chuan inkhel lungchhiat thlak a ni ngei ang tih ka ngaihtuah lawk a, beiseina tlemte ka neih chu tih hlawhtlinin a awm," a ti. A khingpui Serena chu hmeichhe tennis player dangte tana entawn tlak a nih thu a sawi bawk.

Inkhel dangah Britain nula Johanna Konta chuan Vera Zvonareva lakah 6-4, 6-2 in hnehna a chang ve thung. Quarterfinal-ah Konta leh Serena hnehtu Sakkari te an inhmachhawn chhunzawm leh ang.

Champion tura rinkai zinga mi Naomi Osaka chuan Dayana Yastremska lakah harsatna a tawk lo. Japanese nula hian 6-3, 6-1 in hnehna a chang a, Marie Bouzkova 6-3, 6-3 a hnehtu Anett Kontaveit nen an inhmachhawn leh dawn.

Seeded palina Osaka chuan, "Service neih ṭhat hi a pawimawh, hmasawn zel tur chuan kei pawhin na taka service theih ka zir zel a ngai," tiin a sawi. Inkhel dangah world number 1 hlui Victoria Azarenka pawhin Alize Cornet 6-4, 7-5 in a hneh ve bawk.