Aizawl FC fiahna tur NorthEast United

Nimin khan I Day Football khel turin ISL club NorthEast United-in Aizawl an lo thleng a, vawiin chhun dar 12:00 hian RG Stadium-ah I League club Aizawl FC nen an inkhel ang. Group B inkhel dangah Chawnpui FC leh FC Bethlehem te tlai dar 3:30-ah an inkhel ang a, Mizoram Police an awl thung ang.

NorthEast United hi senior team ni loin reserve team an ni a, coach Suhel Nair-a'n rawn hoin Mizo panga an awm a, Aizawl FC lakah an theihna a hriat dawn. Chutihrualin Mizo club tan pawh ISL reserve team hi fiahna a ni thei bawk.

NEUFC chu...

NorthEast United-in I Day Football hmachhawn turin naupang rual an rawn tir a, kum upa ber Rohen Singh pawh kum 21 mi chauh niin player tam zawk hi kum 17 hnuai lam an ni.

Mizo player panga Henry Malsawmtluanga, B. Malsawmtluanga, Laldingngheta, Vanlalchhuanga leh Lalrinfela Ralte te an awm. Felfela hi kumin MPL Under 17 best player kha a ni a, MPL team hmachhawn turin a ṭha tawk em, tih fiahin a awm dawn.

Coach Suhel Nair chuan, "Mizo naupangte an ṭha a, starting eleven tur ka la tifel lo. Bul ṭantu zingah Mizo an awm ngei dawn," tiin Vanglaini a hrilh. Suhel hi Bengaluru FC-ah Head of Grassroots hna te pawh a lo thawk tawh.

NorthEast United reserve coach chuan sawi chhunzawmin, "I Day Football khel tura min lo sawm hi a lawmawm. Champion chu kan duh a, chutihrualin reserve team kan nih avangin khelh dan nghet kan neih a pawimawh. Season thara senior team-a player 4-5 kan thawh theih chuan kan hlawhtlingah kan inngai ang," tiin a sawi.

Inrintawkna ngah AFC

Aizawl FC-in coach atana Victor Lalbiakmawia an dah ngheh hnuah result an nei ṭha a, MPL11-a Mizoram Police 4-1 a an sawp hnuin Chawnpui FC chu 7-0 ngawtin an sawp.

I League champion pawh lo ni tawh Aizawl FC hi North East United reserve lakah rinkai zawk an ni a, inkhel thunun chunga chak thei tura ngaih an ni. AFC tan Champhai Zotlang tlangval Lalbiakdika a che ṭha chhunzawm a, MPL11-a goal nga khung tawhtu winger hian I Day Football-a match khat a khelh tawh aṭangin goal hnih a khung.

Coach Victor-a'n duh thlan tur player a nei a, chutihrualin state pawn aṭanga chahluh NorthEast United an hmachhawn dawn avangin an ṭhat theih dan berin player a rem ang. Aizawl FC-in tun hnaia result an neih ṭhat avangin inringtawkna an ngah a, NEUFC lakah goal an khung chhunzawm a nih pawhin a mak lo ang.

Intuai thar mamawh

Aizawl FC-in season ṭha tak an hman laiin FC Bethlehem leh Chawnpui FC te tan erawh mangchhia a inṭan der. B. Malsawmzuala enkawl Chawnpuiin MPL11 round 5-ah FC Bethlehem hneh mah se I Day Football-a match hmasa berah Aizawl FC 7-0 in an hneh lo - intuai thar an mamawh hle.

Bethlehem hi MPL Qualifier-a pakhatna an ni a, kumin MPL-ah club thar pali ngawt awm mah se ADFA First Division leh MPL Qualifier champion hi table mawngphahah awmin chak hmel an la hmu lo. Chawnpui ai mahin FCB hian intuai thar an mamawh zawk.

Group A-ah team ṭha Aizawl FC leh Mizoram Police te bakah NorthEast United te an awm avangin semifinal luh phak a harsa dawn a, match hmasa bera chak lo FC Bethlehem leh Chawnpui FC tan phei chuan vawiin chak hi a pawimawh lehzual. Team intiat tawk pahnih inkhela chak lo zawk hi an tlaah a ngaih theih ang.