Champion lai Axelsen lakah Sen-a chak lo

Olympic champion lai - world number 1 ni bawk Denmark tlangval Viktor Axelsen lakah khel ṭha viau mah se Lakshysa Sen a hriam tawk lo a, hun pawimawh laia a tihsual ṭhin tuarin a tawpah 22-20, 21-14 in a vanduai zawkah a ṭang.

Kum 22 mi Sen-a hi chak lo mah se a thlen chin hi India mipa badminton tan mellung a ni tho, final lut phak lo mah se semifinal a thlen avangin vawiin tlai dar 6:00-ah bronze medal match khelh tur a la nei dawn a ni.

World number 1 Axelsen-a'n bul ṭan fuhin game khatnaah 3-0 in hma a hruai a, dinhmun siam hman viau mah se Lakshya Sen a zam bik lo - a nihrual hnuah fal takin a kal chhunzawm thei a, point ruk laia san fal lai pawh a nei.

India tlangval hian game lak theihna remchang ṭha lutuk a nei, mahse hun pawimawh laiah a service sual bakah vawi hnih a tisual zui bawk a, game point vawi thum a neih a chhawr ṭangkai lo vek.

Deuce hmasa berah Axelsen-a'n a tawnhriat neih a chhawr ṭangkai, boruak san vanglai takin a che fuh zawk tlat - a service a ni bawk a, inkhel ti muangin point hnih a hmu zawn. Sen-a hian net belin game a lak ngei tura ngaih chu a hloh ta zawk.

Game hnihnaah Sen-a che fuh hmasa zawk ve thungin, a zawna point sarih ngawt hmuin a dinhmun a ṭha hle, 7-0 in hma an hruai. Mahse, Axelsen-a'n zawi muanga pawtthla zelin 10-10 a nih pui leh thei a, game a inthlak danglam leh daih.

Player pahnih an fimkhur tawh, 12-12 a nih chhoh hnuah Axelsen chuan a zawna point thum hmuin a dinhmun a siam ṭah leh ta zawk. Point thuma a san fal hnuah Axelsen a hawi kir tawh lo a, a tawpah Sen-a vuak dik loh vangin a chak zui ta a ni.