Chanmari nge ṭha Ramhlun Athletic?

I Day Football-ah Ramhlun Athletic an la khel ṭha ber a, match hnihah vawi hnih an chak bakah goal kua an khung. Chanmari pawh hi vawi hniha vawi hnih chak tho an ni a, anni erawh 2-1 ve vein an chak. Vawiin chawhma dar 11:00 hian Ramhlun leh Chanmari te hi 1st Bn MAP Ground-ah an inkhel dawn a, a chak zawk hi group A pakhatna turah a ngaih theih ang.

Danny Lalduhawma enkawl Ramhlun tan Felix Lalruatsanga leh Benjamin Lalnunpuia ten goal an khung chhunzawm zel a, goal khung kawngah harsatna an nei lo. Mahse, Ramhlun hian match hnihah goal kua khung mah se goal hnih ve ve an chhuah a, an tlarhnung a phui bik lo.

Chanmari pawh an famkim bik lo. MPL11-ah Chanmari hian goal an chhuah miah lo a, I Day Football-ah erawh match hnihah goal an chhuah ve ve. Lalsangzuala Hmar hoten hnehna la chang zel mah se inkhel an thunun thei bik lo a, Ramhlun nena an inkhel tur pawh hi a hmuhnawm khawp ang.

Inkhel dangah Sihphir Venghlun leh Bethlehem Vengthlang te chawhnu dar 2:00-ah an inhmachhawn dawn. Sihphir Venghlun hi MPL11 ṭantirha an khelh dan aṭanga thlir chuan nasa takin hma an sawn tawh a, First Division club BVT lakah rinkai zawk an ni ang.