Player kim lo India an chak

India mipa hockey team chuan player pakhata tlem zawk chungin Great Britain an hneh - Paris Olympic 2024 neih laiah India hian semifinal an lut, medal la turin beisei an nei sang ta hle.

Nimin tlai inkhel hmuhnawmah ram pahnihte hi hun pangngaiah 1-1 in an inhnehtawk a, penalty shootout an thai hnuah India hi 4-2 in an chak. August 6, Thawhlehni hian semifinal-ah chuan Argentina leh Germany inkhela chak zawk an hmachhawn leh ang.

India hian minute 22-naah penalty corner hmang ṭangkaiin, captain Harmanpreet Singh chuan goal hmahruai a khung. Goal khat hi Britain lamin Lee Morton hmangin an sut thung.

India defender Amit Rohidas chu hnawhchhuah a ni a, quarter hnuhnungah India hi a tlem zawk ni chunga an khelh a ngai, mahse hun tawp thlengin goal dang an chhuah lo, 1-1 in inkhel a tawp.

Penalty shootout hi India tan Harmanpreet Singh, Sukhjeet Singh, Lalit Upadhyay leh Raj Kumar Pal ten an khung vek laiin England tan mi pahnihin an hlah thung a, puanthuah an tel a ngai.

India hian inelna an hmang ṭha rih hle, pool match lamah pawh champion tura rinkai Australia 3-2 in an lo hneh thei tawh bawk. Olympic Games bikah chuan India hian kum 1972 hnua Australia an hneh lehna hmasa ber a ni hial.