Fulham player man tam ber Smith Rowe

Arsenal aṭangin Fulham chuan Emile Smith Rowe an lalut fel ta a, a man zat hi chiang takin tarlang chiah lo mah se Fulham player lei tawh zinga man tam ber a ni tih erawh tarlan a ni.

Khawthlang chanchinbu rintlak ten an tarlan dan chuan - Cottagers hian Smith Rowe manah pound maktaduai 27 an pe phawt a, a man zat hi a pun lehna tur nen chuan pound maktaduai 34 a tling thei ang.

Smith Rowe hian kum 10 mi lek a nih laiin Arsenal a zawm a, kum 18 a tlinin Gunners senior team tan a khel ṭan. Premier League match 80 khelin goal 12 a khungsak a hman a ni.

Theihna nei sang leh player beisei awm tak a ni a, mahse hliamin a tlak buak fo. Match khel mumal loa a awm laiin midangin a khelhna hmunah awmhmun an lo bengbel a, atan thawhchhuah leh a harsa.

England tana vawi thum inlan tawh Smith Rowe chuan, "Manager Marco Silva nen kan inbia a, club hmalak tum dan leh hmathlir hrang hrang min sawipui a, player awmsa te pawh ka ngaihtuah bawk, chuvangin he hmun pan turin thutlukna ka siam.

"Tunah chuan Fulham ka zawm fel tawh a, ka ṭhian tharte nena inpawh leh inman taka inkhelh hlan ka nghakhlel hle. Ka football zinkawnga rahbi thar a nih bakah hmasawnna duhawm a nih ngei ka beisei," tiin a sawi.

Arsenal hian man tam takin player an hralh khat hle, kum 2017 khan Alex Oxlade-Chamberlain chu Liverpool lakah pound maktaduai 35-in an lo hralh tawh, ani hnuah chuan Smith Rowe hi man tam leh ber a ni hial.

Gunners manager Mikel Arteta chuan thlahna thu sawiin, "Club chhunga mite hi chuan Emile hi kan ngaina vek a, zah leh ui tak chungin kan chhuah. Club-in hun harsa a tawh laiin senior team tan a khel ṭan a, a ṭha zawnga danglamna a thlente kha kan hre reng.

"North London club in a mamawh hunah a tlan chhe ngai lo a, a hunah tak a lo ding chhuak ṭhin. Tunah chuan chona thar a hmachhawn dawn, amah leh a chhungte pawh Fulham lamah ṭha taka hun hmang turin duhsakna kan hlan," a ti.

Smith Rowe hian inelna hrang hrang belhkhawm chuan Arsenal tan match 115 khelin goal 18 a khung a, a ṭhiante khung tur vawi 13 a siamsak bawk. Midfielder a ni a, forward atan a hman theih bawk avangin Fulham tan a ṭangkai zualin a rinawm.

Fulham hian Tottenham tana contract hmang zo Ryan Sessegnon chu an lalut fel tawh tawh a, Cottagers vice-chairman Tony Khan chuan an player neih tharte chuan phurna nasa tak a siamsak tih a sawi.

A player thar chungchang sawiin Khan-a chuan, "Player ṭha tak, kum la naupang bawk si Emile kan nei thei hi a lawmawm. Portugal lamah Premier League season thar inbuatsaih turin min rawn zawm nghal," a ti.

Nipui bazar chhungin player dang an la melh zel bawk. Manchester United aṭangin midfielder Scott McTominay lak an tum a, a vawi hnih nan an indawr leh mek - Scotland international hi pound maktaduai 27 man vel bawr a nih a rinawm.