Hmeichhe tennis champion Zheng Qinwen

Paris Olympic hmeichhe tennis singles huangah Zheng Qinwen a champion - Chinese nula hian gold medal inchuhna inkhel hmuhnawm takah Donna Vekic chu straight set hmangin a hneh.

Zheng-i hi kuminah a khel ṭha thei hle, inelna lian hmasa ber Australian Open-ah pawh khan final lutin a vanduai thung. Tunah erawh dan theih a ni tawh lo, a khingpui Croatian aiawhtu hi 6-2, 6-3 in a hneh a ni.

Kum 21 mi Zheng hian Court Philippe Chatrier-ah bul a ṭan fuh hle, set khatnaah 3-0 in hma a hruai fal nghal, a khingpui service lai a set point a hmuh hmasak ber pawh a chhawr ṭangkai nghal.

Set hnihnaah world number 21 Vekic a rawn khel ṭha hret a, mahse game riatnaah world number 7 Zheng zawkin a khingpui service chhuhsak lehin dinhmun ṭhaah a ding a, atan kawng harsa a awm chhunzawm tawh lo.

Chinese tennis player zinga Olympic singles gold medal la hmasa ber Zheng chuan, "Olympic champion han nih chiah mai chuan, ka chungah mawhphurhna leh hmabak hlen chhuah tur lian tak hlen chhuak niah ka inngai ta huai mai.

"Kan ramah ka haw ang a, ka nu leh pa kan chhungkaw hnenah China tan mellung pawimawh ka phun thu hi ka hrilh thei dawn a ni, tunah chuan beiseina sang zawk nen hmalam pawh ka pan thei tawh ang," tiin a lungawi hle.

Paris Olympic tennis an khelhna hi French Open an khelhna hmun kha a ni a, clay court inelna a nih avangin world number 1 Iga Swiatek kha champion tura rinkai a ni, mahse Swiatek meuh pawh Zheng hian a hneh a ni.

Polish nula Swaitek hian bronze medal inchuhna inkhelah Slovakian mi Anna Karolina Schmiedlova chu 6-2, 6-1 in a hneh ve thung a, infiamna khawmpui lianah champion ta chiah lo mah se an ram tan medal a hlawh chhuak.

Tennis inelna huangah Grand Slam an hlu ber a, a dawtah Maters 1000 a ni a, hei hi Olympic nen ranking point tam lam a inzat. Mahse, Olympic erawh ram tana khel an ni a, kum li dana thil thleng a nih bawk avangin an ngai hlu thei hle a ni.

Mipa inelna lamah, nizan khan final khelh niin result kan hre hman lo. Bronze medal match erawh khelh zawh tawh niin, Italian mi Lorenzo Musetti chua Canadian tlangval Felix Auger-Aliassime chu 6-4, 6-1 a hnehin medal a hlawh chhuak.

Mipa final-ah hian Novak Djokovic leh Carlos Alcaraz te an inkhel a, anni pahnih hi Olympic gold medal la vaw chhuak ngai lo ve ve niin, pakhat zawk chuan gold medal a nei dawn tih a chiang. Hmanni lawk pawh khan Wimbledon title an lo inchuh tawh bawk a ni.