Hmeichhe tlan chak ber Julien Alfred

Julien Alfred chuan Paris Olympic hmeichhe 100m intlansaikah gold medal a hlawh chhuak - Saint Lucia ram infiammi zingah Olympic medal la thei hmasa ber a ni a, an ram medal hmasa hi gold a nih avangin a hlu zual hle.

Nimin khan Paris khawpuiah khua lum viau mah se ruah a tla a. Ruah sur hnuia Stade de France-a intlansiakah Alfred-i hian 100m chu 10.72 second chhungin a tlan thleng a, amah tluktu an awm lo.

Alfred hnungah hian American mi, world champion ni lai Sha'Carri Richardson chu a thleng a, ani hian 10.87 second hun a hmang thung a, pathumna chu US mi tho Melissa Jefferson (10.92) a ni thung.

Kum 23 mi Alfred chuan, "Ka pa kha ka hlawhtlinna hmel hmuh a châk ṭhin, mahse kum 2013 khan min boral san tawh. Tunah chuan ka pa duhthusam leh suangtuahna te kha a takin ka ti hlawhtling ta.

"Van aṭangin min lo en ve ngei ang a, ka pa chuan a fanu chu Olympian mai ni loin medal latu ka ni tih a hmuh chuan a hlim ve ngei ang," tiin a hringnuna hun ropui leh lawmna sang a tawn niah amah hringtu a pa a theihnghilh lo.

Ram lian leh langsar ni lem lo Saint Lucia aṭangin Olympic gold medal a la thei a, a tun hma nun sawiin Julien Alfred chuan, "Kan naupan lai chuan kelawngin kan intlansiak ṭhin, intlansiakna tur bik pheikhawk kan nei loh vang a ni.

"School uniform ha chungin kan intlansiak mai ṭhin a, tunah chuan thil a danglam phah ka beisei. Olympic medal kan lak hian kan rama intlansiak tui mite tan hmunhma ṭha zawk a hrin chhuah ngei pawh ka ring," tiin a sawi.