Crawford-a'n world title palina a la

Boxer Terence Crawford chuan nimin khan Los Angeles-ah Israil Madrimov a hneh a, WBA light-middleweight title a la. American boxer hi weight hrang paliah world title pali la thei a ni.

Kum 36 mi Crawford hian unanimous decision (116-112, 115-113 & 115-113) in hnehna a chang a, fight vawi 41 a hmachhawnah a chak vek.

Crawford hi lightweight world champion a ni tawh a, light-welterweight leh welterweight-ah pawh hneh loh a la tawng lo. Chutihrualin tun ṭum hi Crawford-a'n kum 2016 hnua chak tura round 12 hnek a mamawh hmasak ber a ni.

Hnehna an chan zawhah Crawford chuan, "Israil hi boxer ṭha tak a ni a, a chak a, a daih rei bawk. Ṭha tak takin min hnek fuh a, round 12 min hnek pui thei. A che rang a, a khel a nghet ṭha. A ṭhat avangin keipawh ka fimkhur a, ka dawh thei a, hmanhmawh ka tum lo," tiin a sawi.

Crawford hian super-middleweight champion Canelo Alvarez nen inhmachhawn theih dan awm thu a sawi. American boxer chuan, "Kan lungawina tur sum a awm chuan inhnek a awm ang," a ti.