Olympic football: France-in Argentina pet chhuak!

Copa America champion Argentina-in an champion hnuah, bus-a champion an lawm laiin France tihelna hla an sa a, World Cup 2022 final-a an hneh tawh hnu team hi ngeiawm takin an zai el.

France-in hei hi hrethiam loin, chi inthliarna lam hawi ang hiala an ngaih thu an sawi a, mi tam takin Argentina an dem - a bik takin Chelsea midfielder Enzo Fernandez chu a tuartu langsar a ni a, a ṭhiante chet dan social media-a live-tu a nih miau avangin a awm lo hran lo.

Team pahnih inkara boruak awm tawh sa a awm belh a, Zirtawpni zan khan Olympic mipa football quarterfinal-ah an intawng zui - team pahnihin inkhel hmuhnawm leh boruak sang an pho chhuak a, inelna thlengtu France-in 1-0 in hnehna an chang.

France tan Crystal Palace striker Jean-Philippe Mateta chuan inkhela goal awmchhun a khung a, Argentina-in hun tawp thlenga si phurh sutna goal an khung theih loh avangin, 1-0 in an tlawm.

A 'hot'

Nouveau Stade de Bordeaux-a inkhelah Argentina hnam hla play a nih laiin France mipuiten an lo au el a, tun hnai thil thleng avangin Argentine mipui chunga an ngaihdan thlak an la harsat.

Minute ngana lekah France tan Jean-Philippe Mateta chuan goal hmahruai a khung zui a, mipui 37,153 zet pungkhawmte thawm chu pui tak a ni - Les Bleus-in an goal khung hma an vanneihpui a, Argentina-in inkhel thunun mah se, an ṭang tlang thei.

Argentina tan Atletico Madrid coach Diego Simeone-a fapa Giuliano Simeone chuan chance duhawm zet a nei a, mahse, France mipuite vel ṭap nawn turin kum 21 mi forward hian a chance neih a chhawr thei lo.

France hian minute 84-naah Michael Olise hmangin an goal hnihna an khungah an inngai a, mahse, Olise-a goal khung hmain Maghnes Akliouche chu a lo foul a, video assistant referee (VAR) rawn a nih hnuah goal-ah pawm a ni ta lo - hun pek belh minute 12-naah France player Enzo Millot chu hnawhchhuah a ni a, buaina a chhuak bawk.

A thlawn mai maw

Argentina-in World Cup 2022-ah champion nomawi an chawi a, Copa America-ah an champion zui leh bawk - kum 2022 khan khatihlaia European champion Italy chu Finalissima-ah 3-0 in an hneh bawk a, football khawvel an awp tiin a sawi theih.

Olympic football hi Under-23 inelna chauh ni mah se, tun hnai boruak avang ringawt pawhin ngaihven a hlawh a, Argentina hian gold hlawh chhuak leh ngat se, ram leh ram inelnaa hlawhchhuah theih zawng zawng chu tun hnai kum thum chhungin an chawi vek dawn tihna a ni.

Mahse, 1936-a Italy hnua, world champion ni chunga Olympic gold nei hmasa ber ram nih an tumna chu a thamral ta - Arsenal legend Thierry Henry enkawl France tan thawnthu thar ziak turin kawng a inhawng ta a, a hneh tak Argentina hi Barcelona midfielder hlui Javier Mascherano enkawl team an ni bawk.

France hian kum 1984 khan Olympic football-ah gold an lo hlawh chhuak tawh a, hemi hnu hian an la champion leh lo - tunah chance ṭha an nei a, kawng dik an zawh mek. Zanin dar 12:30-ah Egypt nen semifinal an khel ang.

Inkhel dang

Japan-in group stage match thumah hnehna an chang vek a, goal sarih khungin, goal an chhuah miah lo bawk. Mahse, Spain an tawn meuh chuan thawnthu a danglam a, La Roja rawlthar rual hmaah 3-0 in an tlawm.

Spain tan Fermín López chuan goal hnih a khung a, Abel Ruiz chuan goal khat a thawh ve bawk. Japan tan Mao Hosoya chuan post a tihper bakah, a goal khung pawmsak a ni lo bawk a, a vanduai hle.

Zanin dar 9:30-ah Spain hian semifinal-ah Morocco an hmachhawn zui ang. Morocco hian World Cup 2026 thleng tur ram USA chu 4-0 ngawtin an sawp a, Soufiane Rahimi (penalty), Ilias Akhomach, Achraf Hakimi leh Mehdi Maouhoub (penalty) ten goal khat ṭheuh an khung.

France nena semifinal-a intawng tur Egypt-in 1-1 a Paraguay an inhnehtawkpui hnuah, penalty hmangin 5-4 in an hneh. Paraguay hian Diego Gómez hmangin goal hmahruai khung mah se, Ibrahim Adel chuan Egypt tan a sut a, penalty-ah an chak zui.