United lakah Liverpool an chak nuamsa

Pre-season tour mah ni se, Liverpool leh Manchester United inkhel a nih chuan a 'hot' zel. Williams-Brice Stadium, Columbia, South Carolina-ah fans 77,559 zet Liverpool leh Manchester United inkhel en turin an pungkhawm a, 3-0 ngawtin Liverpool an chak.

Williams-Brice Stadium-a American football ni lo, infiamna dang en tura mipui an punkhawm tam ber ṭumah hian Reds tan Fábio Carvalho, Curtis Jones leh Kostas Tsimikas ten goal khat ṭheuh an khung a, Red Devils hian a chhanletna tur an nei lo.

Jurgen Klopp chhuah hnuah Liverpool-in coach thar Arne Slot hoin season an hmachhawn dawn a, hei vang hian season dang zawng aiin Reds hian ngaihven an hlawh - pre-season tour aṭanga teh tur a nih chuan Liverpool an ngaihtuahawm lo.

Slot-a'n heavy metal hnuchhawn hretin, tlarhnung aṭangin game a din a, ball an inpe hnem a, a ṭul hunah na takin an nawr a, United tihsual remchangah an la zung zung zel - Reds hian season tak takah hetiang hian an khel thei a nih chuan an ngaihtuahawm lo ang.

Liverpool boss Slot chuan, "Kan result avangin kan lawm a, goal ṭha tak tak kan khung bawk. Chutihrual chuan game kan thunun tawk lo a, United khan vawi tam min ṭhawng a ni," a ti a, an vanneih tel thu a sawi.

Reds tan hian keeper Caoimhin Kelleher leh amah thlaktu Vitezslav Jaros te mamawh hunah an che ṭha ṭhin a, Kelleher hi first choice nih theihna tur zawnga chhuak tur anga sawi a awm avangin Jaros che ṭha kha Slot tan a hmuhnawm ang.

Kum 23 mi Jaros hian kum 2020 khan Liverpool hi zawmin, Reds tan a la khel miah lo - Irish club St Patrick's Athletic, non-league club Notts County, League Two club Stockport County leh Austrian Bundesliga club Sturm Graz-ah te loan-in a khel.

Erik ten Hag-a enkawl Manchester United an mualpho a, an mualpho chhan langsar erawh an chance neih an chhawr thei lo chu a ni. Number 10-ah Mason Mount a hmuhnawm a, season thara he position-a a khel tur hi United fan-ten hmuh an châk ang.

Chutihrual chuan Mount bakah Amad Diallo leh Marcus Rashford ten an chance neih uiawm takin an chhawr lo vek a, goal hmaa hriam dan tur an zir thar a ngai.

United boss Ten Hag chuan, "Sawithiam a harsa hle. Hmasawnna hmuh tur a awm a, chutihrual chuan kan goal chhuah danah erawh lawmna tur a awm lo," a ti a, hmasawnna an neih rualin siamṭhat tur an la neih thu a sawi.

Red Devils hian US tour an neih hmain friendly match pahnih an khel a, match hmasa zawkah Rosenborg (1-0) ngam loin, Rangers (2-0) an hneh thung. US tour-ah match thum khelin, Real Betis (3-2) hneh mah se, Arsenal (2-1) leh Liverpool (3-0) lakah an tlawm thung - August 10-ah Manchester City nen Community Shield an khel tawh dawn.

Liverpool erawh an US tour match thumah an chak vek a, Real Betis (1-0), Arsenal (2-1) leh United (3-0) an hneh vek a, August 17 zana Ipswich Town nen season thar atana an league match hmasa ber an khelh hmain, August 11, Pathianni zanah Sevilla mikhualin, season ṭan hmaa an match hnuhnung ber an khel ang.