Fullkrug manah Hammers leh Dortmund an inrem

West Ham chuan Germany striker Niclas Fullkrug chu Borussia Dortmund aṭangin an la lut dawn a, German club nen hian pound maktaduai 27-in an inrem.

Kum 31 mi striker hi Euro khelh zawh takah khan Germany tan inlanin, goal hnih a khung a, bul ṭan a nei miah lo thung. Inrinni khan Dortmund hian an striker hi Switzerland-a training camp an neih mek chhuahsan an phalsak a, club dang nen indawr tura chhuahtir an nih thu an sawi.

Fullkrug hian season hmasa ṭan dawn khan Dortmund hi Werder Bremen aṭangin pound maktaduai 12.6-in a zawm a, inelna hrang hrangah match 46 khela goal 16 khungin, assist vawi 10 a nei.

Champions League final an luh theih nan player pawimawh a ni a, mahse, final-ah Real Madrid an ngam lo thung. Germany tan vawi 21 inlanah goal 13 a khung a, Die Mannschaft tan meuha inlan phak a nih avangin ani ang striker lakluh theih hi Hammers tan chuan chanchin lawmawm a tling.

Dortmund hian striker thar Serhou Guirassy an nei a, season hmasa Bundesliga-a match 28-a goal 28 khungtu hi VfB Stuttgart aṭangin €18mtd-in an lei - hei vang hian Fullkrug hralhchhuah pawh hi an pawi ti lo niin a lang.

Hammers hian Dutch forward Crysencio Summerville an la lut zo deuh chiah bawk a, ani bakah hian Aston Villa forward Jhon Duran chu an la thlithlai mek bawk.