Haaland-a'n hattrick a siam

Manchester City striker Erling Haaland chuan Chelsea lakah goal thum a khung a, US-a pre-season tour neih mekah Blues chu 4-2 in an hneh - Haaland hian a goal hmasa ber hi penalty aṭangin a khung a, goal khat dang hi Oscar Bobb-a khung a ni.

Chelsea tan Raheem Sterling leh Noni Madueke ten goal khat ve ve khung ve mah se, awmzia a nei thui lo a, Blues-in an goal hmasa zawk an khung hian goal li an chhuah fel der tawh a, an tan beiseina a tlem tawh.

Ohio Stadium-a inkhel hi fans 70,000 ngawtin a hmunah an en a, Chelsea-in an coach thar Enzo Maresca hnuaiah beisei an phak lo chhunzawm zel - Blues hian US-a pre-season tour-ah match li khelin vawi khat chiah an chak.

League One club Wrexham chu 2-2 a an inhnehtawkpui hnuah, Scottish champion Celtic chu 4-1 in an ngam lo a, Club America chu 3-0 in hneh ve mah se, City lakah 4-2 in an tlawm zui.

Chelsea boss Maresca-a'n London club-ah system thar tuh a tum a, an khelh dan phung thlakin, tlarhnung aṭanga game siam a tum - a la hlawhchham tluang zel. City laka an goal chhuah pali hi tlarhnung lam tihsual aṭanga lut vek a ni a, tlarhnung aṭanga game siam turin an thiamnain a la tlin rih lo.

Blues hian an ṭhat dan bera an la khelh loh chu chhuanlam tur nei mah se, City hian Euro leh Copa America khelh vangin senior player 15 ngawt an chhawr thei rih bik lo tih hriat a ṭha.

August 18-ah Chelsea hian City mikhualin, season thar atana an league match hmasa ber an khel dawn a, hemi hma hian Real Madrid leh Inter Milan te chu friendly match an khelhpui ve leh phawt ang.

City pawh US tour-ah hian an che ropui lutuk bik lo. Match hmasa pahnihah Celtic (4-3) leh AC Milan (3-2) lakah an tlawm a, Barcelona (2-2) nen an inhnehtawk hnuah, penalty-ah 4-1 in an tlawm zui a, a tawpah Blues an hneh ve hram.

Pep-a team-te hian friendly match an khel tawh dawn lo a, August 10 zanah FA Cup champion Manchester United nen season bul ṭan nan Community Shield an inchuh ang.