Manchester United captain Harry Maguire Court-ah thiam loh a chang; England squad aṭangin an paih

England defender Harry Maguire chu Greek thliarkar Syros-ah August 25 khan a chungthu ngaihtuah a ni a, thiam loh an chantir. Kum 27 mi defender hi Gareth Southgate chuan England squad aṭangin a dah chhuak bawk.

Manchester United captain Harry Maguire hi Greek thliarkar Mykonos-ah chawlh hmangin a zin a, August 20, Ningani zanah bar pawna insualnaah a tel avangin zan hnih chhung lung in bang a zut. Hemi buaina kal zelah court hmaah inlanin thiam lo a chang.

Manchester United captain Harry Maguire hi kum thum chhung en thlak a ni ang a, hemi hun chhung hian a ti sual nawn a nih chuan thla 21 leh ni 10 chhung jail bang a zut ang. Maguire hremna a kaltlang nghal lohna chhan hi a vawi khat pawi khawihna a nih vang a ni.

England defender bakah hian a unaupa kum 29 mi Joe Maguire leh an ṭhianpa kum 29 mi Christopher Sharman te pawh thiam loh an chantir. Joe leh Sharman te hi mipui tana hnathawktute vawi khat aia tam kut thlaka puh a ni a, thuneitute tham tuma puh an ni a. Sharman hi ṭawngkam duk dak lo hmanga puh tel a ni a, an puhnaah te hian thiam loh an chang.

Joe leh Sharman hi thla 13 chhung lung in tang thei tura tih an ni a, Maguire angin kum thum chhung enthlak a ni ang. Court hma hian Harry Maguire a lang tel lo a, a pa Alan Maguire a tel thung.

Manchester United hian Greece rama human rights ukil ṭha ber zinga mi Alexis Anagnostakis a ruai a, ani hian an thurel hun sawn dil mah se judge-in a pawmsak lo.

Manchester United chuan, "Harry Maguire hian an puhnaah hian a fihlim thu a sawi a, thiam loh a nei loh thu a sawi. Hriat tel tur chu thuneitute hian an puhna hi an puang har a, court hmaa insawifiah turin inpuahchahna hun an nei tlem. Thurel hun sawn dil mah se phalsak an ni lo..

Harry Maguire-a dan hremiten court thutlukna hi an khinglet dawn a, uluk taka inpuahchahin thutlukna dik zawk a awm thei ang," tiin an player chungchangah thuchhuah an siam.

Anagnostakis hian court hmaah Maguire-a unaunu Daisy chu Albanian mi ṭhian hoin damdawi in an chiu a, a thidang niin a sawi. Court hmaa thiam loh changte hian damdawi in panna tur lirthei an ngiat a, police station panpui an ni thung.

English mite hektu lam chuan Harry Maguire, Joe leh Sharman te hian tharum leh ṭawngka hmangin Police an bei let niin an sawi a, Manchester United captain-in police pakhat a keu thlu lai pawh a darh nasa hle. Police pakhat chuan, "Tu nge ka nih in hria em? Manchester United captain ka nih hi. Sum ka ngah a, khawngaihin min chhuah ula, pawisa ka pe ang che u," tiin pawisa hmanga tham tumah a puh.

Hetihlai hian Maguire te lam chuan ṭawng an hriat fuh tawk loh vang niin an sawi thung a, an thil tih sual avanga pawisa chawi turte pek tum angah an insawi thung. Police kut thlak an pawm a, chutihrualin Maguire te lam hian insawifiahna an nei.

Greek police hian ṭha takin an dawr lo a, Anagnostakis chuan, "Police-in kut an thlak a, forensic expert pawhin an finfiah. Maguire hi a eizawnna ber a kea an vuak hnuah chauh a thinrim," tiin thiam thu a sawi.

Harry Maguire hi Manchester United captain a ni a, midang tana entawn tlak tur a ni. Tuna thil thleng avang hian Maguire hi captain aṭanga paih thlak theih a ni a, amaherawhchu United hian a sar hu laia thutlukna siam an tum lo.

Pound maktaduai 80 man defender Maguire dinhmun tur hi chu September 19-a Crystal Palace nen Premier League match hmasa ber an khelh hunah a hriat chauh dawn. Tun dinhmunah erawh club-in ṭanna thuchhuah an siam avangin captain an thlak mai a la rinawm loh.

United hian buaina chhuah ṭantirh aṭangin Maguire hi an be pawp reng a, thil thlen dan an hrechiang hle. Ole Gunnar Solskjaer-a hote hian September 2-ah training an ṭan dawn chauh a, friendly match pawh an neih chhoh rinawm mah se media tan tel theih dawn em tih hriat a la ni lo thung.

England manager Gareth Southgate chuan September thla tir lama Iceland leh Denmark nen Nations League an khelh turah Harry Maguire tel zet mah se Greece rama buaina a tawh avangin squad aṭangin an dah chhuak.

Southgate chuan, "Maguire-a min hrilh ang hi kei chuan rinhlelh tur ka nei lo. Amaherawhchu tun dinhmunah chuan a tel loh hi ama tan leh kan tan a ṭha rih zawk a ni. Harry hian amah vanga England team-in a ṭha lo zawnga ngaihven a hlawh chu pawi a tih thu a sawi a, chutihrualin insawifiahna tur a neih thu a sawi tel bawk," tiin a telh loh chhan a sawifiah.