England squad-ah Grealish a tel lo

UEFA Nations League-ah England-in September 5 leh 9 hian Iceland leh Denmark khualmualah an hmachhawn dawn a, Premier League-a Aston Villa inhamtanna atana player pawimawh Jack Grealish a tel lo. Villa captain bakah hian season tawp lama inhliam vanga Leicester City tana inlan thei lo James Maddison hmaih a ni bawk.

Gareth Southgate hian Manchester City midfielder Phil Foden, Manchester United striker Mason Greenwood leh Leeds midfielder Kalvin Phillips te chu a vawi khat nan a ko tel thung. Foden leh Greenwood te hi la naupan avangin an tan chuan Euro 2020 khelh hun sawn hi vanneihna a ni thei a, kum 24 mi Phillips pawhin Premier League hming a chher theih chuan England-ah hmun nghet a chang chho thei ang.

England squad-ah hian ram tana la inlan lo keeper Dean Henderson a tel a, Southampton tana season ṭha tak hmang Danny Ings a tel. Liverpool forward hlui hian league-ah goal 22 a khung a, Jamie Vardy chiah a tluk lo. Manchester United keeper Henderson hian loan hmanga a khelhna Sheffield United chu pakuana a nihpui bawk.

Southgate hian Bahamas tlawh avangin quarantine captain Harry Kane chu squad-ah a tel tho a, Manchester City wing back Kyle Walker pawh a koh a ni leh ta bawk. Covid-19 vangin Euro 2020 khelh a ni lo a, England match hnuhnung ber chu November 2019-a Kosova 4-0 a an hneh kha a ni.