Ronaldo telna Portugal an danglam
European Championship-a champion lai Spain an hneh avangin Croatia chu group stage a zawh meuh chuan champion tura rinkai an ni tawh a, final kalkawng thlirin kumin hi Ante Cacic-a hote tan hun ṭha a ni. Amaherawhchu Stade Bollaert-Delelis, Lens a last 16 inkhelah Croatia hian zan dang an pha lo a, Cristiano Ronaldo telna Portugal an hmachhawn kher bawk avangin a vanduai zawkah an ṭang.
Inrinni zan inkhelah minute 90 chhungin goal a lut lo a, minute 117-naah substitute Ricardo Quaresma chuan Real Madrid forward Ronaldo thawhrah sengin Portugal chu quarterfinal a thlen pui. Fernando Santos hote hian June 30 zan dar 12:30-ah Switzerland hnehtu Poland an hmachhawn ang.
Modric a dam
Croatia-in Spain an hma-chhawn ṭuma inhliam vanga khel thei lo Luka Modric an chhawr thei tawh a, an starting eleven hi knockout stage match hmasa pahnih Turkey leh Czech Republic an hmachhawn ṭuma khelte kha an ni. Chumi awmzia chu Spain an hneh ṭuma bul ṭantu panga Tin Jedvaj, Sime Vrsaljko, Marko Rog, Marko Pjaca leh Nikola Kalinic te chu champion lai hmaah khel-
ṭha mah se inkhel pawimawhah tawnhriat ngah zawk player-te chu coach in a ring zawk.
Portugal-in an innghahna Ronaldo leh Nani chu hma tawng-ah an inkawptir leh a, Manchester United winger hlui Nani hian ram tan match 100-na a khelhna chiah a ni. Fernando Santos-a'n midfielder nei ṭha Croatia hmachhawn turin midfield-ah hming langsar ber Joao Moutinho chu match hmasa lama a khelh
ṭhat tawk loh avangin Monaco midfielder aiah Sporting Lisbon midfielder Adrien Silva a thlang a, defence-ah Jose Fonte leh Cedric Soares ten hmun rawn changin Borussia Dortmund left back thar Raphael Guerreiro a dam hman bawk.
Besei pha lo
Team ṭha zawka ngaih Croatia-in an ṭhatna ber midfield-ah ball an inpe fuh thei lo a, inkhel hmuhnawm tura beiseiah hming langsar Ronaldo, Modric leh Ivan Rakitic ten hmunawl an hmuh theih loh avangin inkhel pawh a hmuhnawm lo.
Croatia hian vawi 17 lai goal attempt nei mah se goal zawna kal a awm lo. 1980 Euro hnua goal zawna pet si lo a, goal attempt ngah ber record an siam. An khingpui Ronaldo-a'n minute 90 chhungin goal attempt a nei lo, hetiang hun hi Portugal captain hian European Championship-a a tawn vawi khatna chauh a ni.
Extra time hun tawp lamah Croatia-in risk lain an nawr a, defender Domagoj Vida-a'n a lu hmangin goal a khung teuh a, Ivan Perisic-a ball tauhin goal ban a per bawk. Inter Milan winger Perisic-a'n goal ban a tauh ber hnu hian Ivan Strinic-a'n ball chang mah se Ronaldo-a'n chhuhsakin substitute Renato Sanches a pe a, Bayern player thar hian chak taka la lutin Nani hnenah a hlan chhawng. Match 100 khelhnaah Nani-a'n Ronaldo tan ball fing tak a pe a, Real Madrid forward ball pet chu keeper Danijel Subasic-a'n dang mah se a per chu Quaresma-a'n awlsam takin a tauh lut.
Ronaldo ball pet hi goal zawna kal hmasa ber a ni a, Quaresma goal khung hi goal zawna a vawi hnihna a kalna chauh a ni. Croatia vawi khat an chesual a, player ṭha bik Ronaldo awmna lama an fimkhur tawk lo chu an chak loh chhan a ni.
Croatia-in an siphurh sut nan hun tam an nei lo a, defender Vida hmangin Portugal vawi khat dang an rum ṭhaih a, goal zawna an pet theih tlat loh avangin a chak lo zawkah an ṭang.
Eng nge an sawi?
Croatia boss Ante Cacic chuan, "Kan fixture a fuh a, kan kalkawng fuh tak kan hman ṭangkai thei ta lo hi pawi ka ti takzet a ni. Portugal kan hneh chuan Poland kan hmachhawn dawn tih kan hria a, mah se football a nih tlat avangin goal kan khung loh chuan sawi theih kan nei lo. Goal kan khung lo tih loh kha chu kan khelh danah sawisel tur a awm meuh lo, minute 120 chhunga kan tihsual chu kan goal chhuah kha a ni. Portugal hi team ṭha tak an ni a, kan tlak takah chuan champion rinkai an awm ngai a nih chuan Portugal hi an ni ang," tiin a sawi.
Portugal coach Fernando Santos chuan, "Inkhel harsa tak a ni. Inkhel thunun tum mah ila Croatia lamin an phal lo a, ani pawh inkhel thunun theihna hun kan siam bik lo. Game mawi tak khelh theih a châkawm a, chutihrualin champion nan chuan game mawi a fuh ber lo ṭhin," tiin inkhel chungchang a sawi.