Swiss aia vannei zawk Poland

European Champion-ship 2016 last 16 match hmasa berah Poland leh Switzerland te hun pangngaiah 1-1 a an inhnehtawk hnuin penalty shootout-ah Arsenal lak thar Swiss midfielder Granit Xhaka-a'n penalty a khung ve lo a, player dang zawngin pet lut vekin 5-4 a chak Poland chu quarterfinal lut hmasa ber an ni.

Inrinni zana Saint Etienne-a inkhelah ram pahnihten European Championship-a an thlen san ber ṭum an tawng a, player intluk tawk an nih hlawm avangin an in ngam hle. Poland hian counter attack hmang ṭangkaiin Jakub Blaszczykowski chuan minute 39-naah he inkhel goal hmasa ber a khung a, Fiorentina midfielder hian tun tournament-a goal hnih a khungna chiah a ni.

Swiss lamin midfield-ah ro an rel a, Arsenal player thar Xhaka leh Xherdan Shaqiri te ball inpe vel chu hmuhnawm a tling. Poland goalkeeper Lukasz Fabianski chuan Ricardo Rodriguez freekick ropui taka a dan bakah Haris Seferovic chuan goal bar a pet per bawk, Swiss an vanduai.

Second half-ah Poland an awm mai mai bik lo a, Swiss player-ten Robert Lewandowski an veng uluk a, Jakub Blaszczykowski leh Lukasz Piszczek ten Swiss tlarhnung an rum ṭhaih zauh zauh.

Minute 82-na a ni a, Swiss captain Stephan Lichtsteiner ball cross chu Eren Derdiyok-a'n lo khawih perin, ball rawn kang let chu yard 18-a hla aṭangin Shaqiri chuan mawi takin Poland goal-ah a overhead kick lut a, 1-1 chiah a ni. Stoke midfielder goal khung hi goal ropui a ni a, goal mawi leh pawimawh bik a ni.

Hun pangngai minute 90 chhungin ram pahnihte hian goal khung tumin vawi 39 vet an pet hman a, kumin Euro inkhel awm tawh zingah goal khung tuma an pet tam ber ṭum a la ni hial. Mahse, ram pahnihte goal hmaah an hriam tawk loh bakah goalkeeper-te chet ṭhat ni a nih avangin hun pek belh zawh hnuah pawh goal dang a lut tawh lo.

Penalty an pet e...

Switzerland tan Ste-phan Lichtsteiner chuan pet hmasa berin a khung nghal a, an captain penalty hi an ram chanchinah major tournament-a penalty an chhuih luh hmasak ber a ni nghe nghe. Poland lamin Lewandowski rawn dinchhuahtir ve nghalin Bayern Munich striker hian a hlah loh laiin Swiss midfielder Xhaka-a'n a hlah zui thung.

Arkadiusz Milik, Ka-mil Glik leh Kamil Gro--sicki ten Poland tan khung vekin - Shaqiri, Fabian Schar leh Ricardo Rodriguez ten Swiss tan khung ve mah se Poland tan Krychowiak chuan chakna goal a khung zui a ni.

Dai ngai loh ram

Poland hian Euro 2016-ah vawi hnih chiah hehna la chang mah se an ram chanchina a vawi khat nan quarterfinal an lut a, dai ngaih loh ram an dai. Tun tournament-a minute 370 chhung goal an chhuah tawh loh chu Shaqiri-a'n a tih tawp sak thung.

Group stage-ah Nor-thern Ireland leh Ukraine te si khat faia an hneh bakah world champion Germany nen goal awm loin an inhnehtawk bawk a, match li khelh aṭanga goal thum khung hi a tam lo a, goal khat chauh an lo chhuah avangin an tlarhnung erawh a phui tih a chiang.

Qualifying lama goal 13 khunga top scorer dinhmun luahtu striker Lewandowski-a'n inkhel pangngaiah goal a la khung lo a, Bayern hma-tawng hian Portugal an hmachhawn hunah chuan goal khung thiam bik a nih zia a lantir a ṭul tawh ang.

Eng nge an sawi?

Switzerland boss Vla-di-mir Petkovic chuan, "Ka naute khan khelmual chhungah an theih tawp an chhuah a, mah se vanduai thlak takin tihsual kan neih avangin a chak lo lam-ah kan ṭang," tiin a sawi.

Poland manager Adam Nawalka chuan, "Swiss kha tlar hma leh tlar hnungah khan 'world class' an ni. Goal kan khung avangin a venhim lam kan ngaipawimawh chhunzawm a, ka tlarhnung aṭang khan inkhel kan thunun ta zawk. Ka naute theihna san zia a lang a, min ti lawm hle," tiin an khingpuite a fak rualin a naute a fak hmaih lo.

A striker goal la khung lo Lewandowski chungchang sawi chhun-zawmin, "Robert hi team tan a ṭangkai a, a ṭhiante goal khung tur a siamsak bakah hmunawl a siam sak bawk. Ani hian kan team a ti chakin inrin-tawkna min siam," a ti.