Wales chakna Northern Ireland goal!
Wales innghahna Gareth Bale-a'n Northern Ireland nen British Derby an khelh hmain match thum chak zawh hnua puanthuah tel mai an tum loh thu a sawi a, a thusawi chu Inrinni zan khan Northern Ireland defender Gareth Mc-Auley-a own goal hmangin nem ngheh a ni.
Kum 58 hnua an major tournament hmasa berah Wales-in quarterfinal an lut nghal a, Parc des Princes-a inkhelah Northern Ireland mipuite chu 1-0 in an vel ṭap. N. Ireland tan McAuley-a goal hi October 2011 hnua mahni lama an khung leh hmasak ber a ni a, own goal khungtu hnuhnung ber hi McAuley tho hi niin Italy tan an lamah a lo khung sak tawh!
Fak phu N.Ireland
Kum 1958 World Cup-ah Wales leh Northern Ireland ten quarterfinal an thleng ve ve a, Inrinni zan kha team pahnihin major tournament-a knockout stage an luh lehna hmasa ber ve ve a ni.
Northern Ireland-in tlar-hmaah Wales-in player an nei
ṭha zawk tih hriain fing takin an in remkhawm a, an defending fing leh awmze nei avangin hun rei tak chhung chu Wales tlarhma lama Bale leh a hote an dang chat thei.
Michael O'Neill-a naute an tumah an chiang a, inkhel ṭantir lamah counter attack hmangin hun ṭha an nei nghal. Mahse, Stuart Dallas-a'n an hun ṭha neih a chhawr ṭangkai thei lo a, Leeds United midfielder goal shot hi Wales keeper Wayne Hennessey chuan a lo dan sak.
Bale a thiam reng
Group stage-a goal khung vektu Gareth Bale-a'n last 16-ah goal khung lo mah se an goal neihchhun erawh a thawhrah a ni a, Real Madrid forward ball cross hi N.Ireland centre-back McAuley chuan an lamah a lo tlawh goal.
Real Madrid forward hian minute 75-naa an goal luh nana tha a thawh hma hian freekick aṭangin pet goal-na hun ṭha a nei a, mah se group stage match hniha free kick aṭanga goal khungtu forward hian N.Ireland keeper Michael McGovern a paltlang zo lo.
Boruak a sang
Wales-in hma an hruai hnuah hun khawhralna an zawng niin a lang a, hun tawp hnaih lamah captain Ashley Williams leh Jonny Williams te chu khelmual chhungah enkawlna pek an ni.
Khelmual pawn lamah Wales player-te chet dan avangin N.Ireland manager O'Neill a lungawi lo tih a lang a, player a nih laia Newcastle United midfielder ṭhin hian inkhelh zawhah Wales coaching staff ṭhenkhat chuan Williams hi hun khawhral turin an lo fuihpawrh niin a sawi!
Mahse, inkhelh zawh thlenga Swansea City defender Ashley Williams hi enkawl a nih avangin quarterfinal-a Wales inlan hunah tlarhnung a ho khawm thei lo a nih pawhin a mak lo ang.
Eng nge an sawi?
Wales manager Chris Cole-man chuan, "Ka naute chunga ka lawmna em em na chu kan khelh ṭhat loh niah pawh theihtawp an chhuah hram hram zel hi a ni. Khel ṭha lo mah ila quarterfinal kan luh miau avangin ka lawm a, Northern Ireland khan fak an phu a ni. Inkhelh a harsa em em a, zaninah kha chuan team ṭha zawk an ni. Tunah chuan quarterfinal-ah tupawh hmachhawn dawn ila chumi tur chuan kan inpeih a ṭul a ni," tiin an inkhelh hmabakah rilru an pek nghal tur thu a sawi.
Northern Ireland manager Michael O'Neill chuan, "Khel
ṭha zawk nichungin kan chak lo a, a lungawi thlak loh a ni. Ka player-te khelh danah sawisel tur ka hre lo a, hei aia ṭha zawk beisei tur a awm lo. Gareth McAuley khan ball cross a nih dawn khan thutlukna siam tur a nei a, chu chu a hnunga player dang an awm leh awm loh a ni," tiin own goal khungtu West Brom defender chu a fimkhur tawk loah a ngai.