US hnehin Colombia-in a tawp khar ṭha

27th June, 2016

Colombia lungngai rumri chu Pathianni zing khan lawmna aw rawlin a tlak ta - Copa America Centenario thlengtu United States chu goal khat faia hnehin Colombia hi pathumna an ni.

Kum 2001 khan Colombia hian Copa America hi an thleng a, an champion nghe nghe. Hemi hnua an tawn san leh ber chu tun ṭuma pathumna an nih hi a ni. US erawh kum 1995-a palina an nih bak kha hma an la sawn thei rih lo thung.

University of Phoenix Stadium, Glendale-a inkhelah hian minute 31-naa Carlos Bacca goal khat khung hmangin hnehna an chang. AC Milan forward Bacca hi captain James Rodriguez through ball
ṭha tak hmawr bawk tuah a ṭang a ni. Ram pahnihte hi group A-ah awm dunin an match hmasa berah an lo inhmachhawn tawh bawk a, Jose Pekerman-a naute hian 2-0 in hnehna an lo chang tawh bawk.

USA hian goal phur mah se an rama inkhel an nih miau avangin huaisen takin an nawr let a, Bobby Wood chu goal hmaah a hriam tawk loh bakah Clint Dempsey freekick ṭa zet mai chu Colombia goalkeeper David Ospina chuan ropui takin a lo dan sak. Team pahnihte hi a tawpah chuan player 10 ve ve chauh an ni a, hun tawp dawnah Michael Orozco leh San-tiago Arias te hnawhchhuah an ni.

Colombia coach Jose Pekerman chuan, "Lawmman dawng phak nih hi a lawmawm a, ram leh ram inkhelha hlawhtlinna chan harsat zia kan hiatthiam a pawimawh. A sang zual zinga kan tel zel thei a nih chuan champion a hla tawh lo a, kan la hlawhlting mai ang," tiin a sawi.

United States coach Jurgen Klins-mann chuan, "Colombia khan first half-a an goal khung bak kha hun ṭha an nei lo tluk a ni a, keini kha kan vanneih ni chu nise khung tam zawk thei dinhmunah kan ding," tiin an vanduai nia a hriat thu a sawi.

An thlen chin chu hmasawna a nih thu sawi telin, "Copa America-a a sang pali zinga tel hrim hrim khan he ram tan hian hmasawnna ropui tak a ni a, ka naute hi an thlen chinah an lawm tur a ni. Kan hun tawn hian mipui a ti phur hlein ka hria a, inkhel zawng zawng kha kan en chuan Copa America emaw World Cup emaw kan thleng thei tih a entirin ka hria," tiin a sawi zui bawk.