Euro 2012 final rematch Italy Vs Spain
Kum li liam ta khan Olym-pic Stadium, Kiev-ah Spain-in David Silva, Jordi Alba, Fer-nando Torres leh Juan Mata te goal hmangin Italy chu 4-0 in an hneh a, European Championship final history-a insawp ber ṭum a ni. Zanin dar 9:30 hian Stade de France-ah Europe ram lian pahnih hi an intawng leh dawn a, Azzurri tan zanin hi phuba lakna remchang ni mah se chak tura rinkai zawk erawh La Roja an ni.
A hun lo
Azzurri hian striker hming langsar an nei lo a, midfield lamah Andrea Pirlo a upat tawh vanga koh a nih loh bakah midfielder ṭha Marco Verratti leh Claudio Marchisio te chu inhliam vangin an tel thei lo. Amaherawhchu Italy-in Antonio Conte kaihhruaina hnuaiah champion rinkai ni phak Belgium an hneh nghal a, Sweden an hneh leh bawk avangin group hmahruaitu nichiang hmasa ber an ni.
Italy hian group stage an khelh dan aṭanga thlirin team awlsam zawk hmachhawn an phu a, mah se an khingpui tur chu team a zawnga tum châk-awm lo ber Spain an ni. Vicente del Bosque hian last 16 an luh chian hnuah starting eleven ngai bawk hmangin Croatia an hneh lo a, result
ṭha lo niin lang mah se thlirna tlang dang aṭang chuan chak loh a pawi loh laiin hneh loh an tawngah a ngaih theih thung.
Inkhel tur ramte sulhnu
aṭanga thlirin zanin hi last 16 inkhel pariat zinga hmuhnawm ber tura ngaih a ni a, en a châk-awm viau nachungin an intawng hma mah mahah a ngaih theih.
An intluk tawk
Spain leh Italy hi vawi 34 an intawng tawh a, vawi 10 ve ve chak tawhin vawi 14 an inhneh-tawk. Euro bikah pawh vawi nga intawngin vawi khat ve ve an chak a, vawi thum an inhnehtawk.
FIFA World Cup-ah erawh Italy an chungnung a, vawi li an inhmachhawn tawhah Azzuri hi vawi hnih chakin Spain in chak an la nei ve lo.
Candreva tel loin
Italy-in match thum an khelh tawhah Lazio winger Antonio Candreva a khel tluan vek a, kum 29-a upa winger hian malpui hliam vangin Spain a hmachhawn thei lo. Antonio Conte-a'n goal tam deuh khung aiin khingpuite aia khung tam a ṭul zawk thu a sawi tawh a, chumi awmzia chu Spain nena an inkhelh hunah hian Juventus bang rinawm keeper Gianluigi Buffon bakah defender pathum Giorgio Chiellini, Leonardo Bonucci leh Andrea Barzagli te an pawimawh dawn tihna a ni.
Morata bulah?
Spain tan Juventus striker Alvaro Morata chu thlak theih niin a lang lo a, group stage lama a kawppui Nolito erawh a dinhmun a nghing. Celta Vigo forward ai hian kum 35-a upa Athletic Bilbao forward Aritz Aduriz a lut a nih pawhin a mak lo ang. Group match hnuhnung berah Real Madrid winger Lucas Vazquez lut tawh tura sawi a ni a, amaherawhchu Spanish rawlthar duhawm hi tun thlengin a la inlan lo.
Vicente del Bosque-a'n tu pawh luhtir se player ṭha vek an ni dawn a, Italy tana ven ngai tur chu ball semtu Andres Iniesta a ni ang. Azzuri hneh turin Barcelona midfielder a pawimawh dawn a, goalkeeper David de Gea-a'n khelhna hmun a chang leh a nih chuan Croatia an khelh ṭum aṭanga thlirin nasa taka hma sawn a ṭul ang.