Pirlo-a'n media a hmachhawn: Higuain a chhuak dawn

Juventus manager thar Andrea Pirlo chuan Italian club coach a nih hnua a vawi khat nan media a hmachhawn a, kum 41 mi coach chuan striker Gonzalo Higuain chhuah tur thu a sawi. Pirlo chuan, "Player ropui tak a ni a, champion player ropui a ni. Mahse, tunah chuan a chhuah a hun tawh, " tiin Argentine striker chhuah tur thu hi a puang. 

Kum 41 mi coach hian tun hnaia chhuak tur anga sawi Paulo Dybala erawh a la cham tur thu a sawi a, Juve fan-te hlauhthawnna chu a beng daihsak. Pirlo chuan, "Dybala hi zawrh lai a ni lo," a ti.

Kum 32 mi Higuain hian kum 2016 khan Napoli aṭangin Juventus hi a zawm a, a hunlai hian khawvel football transfer-a player manto pathumna niin Juve hian pound maktaduai 75 ngawtin an lalut. 

Higuain hian Juve tan a khelh bakah AC Milan leh Chelsea-ah te pawh loan-in a kal a, Juve tan hian match 149-ah goal 66 khungin assist vawi 16-a nei a, a man zat nena chhutin a ropui tawk lo. 

Season hman zawh takah khan match 44 khelin goal 11 a khung a, assist vawi riat a nei. Higuain hian a contract-ah kum khat dang a la nei a, Juve hian hralh kher loa free transfer-a an chhuahtir a nih pawhin a mak lo ang. 

Higuain hian kar hmasa lawk kha chuan contract a la neih avangin Juve a chhuahsan loh tur thu a sawi a, mahse Pirlo berin mamawhin a inhre tlat lo a, tunah chuan a kalna tur inrinsiak a ni mek. 

Argentina tan vawi 75 inlana goal 31 khung thei Higuain hian Major League Soccer  lam a pan mai theih thu a hmain a lo sawi tawh a, a professional career ṭanna River Plate hming an lam ri bawk. 

Juve boss ni tura Maurizio Sarri thlaktu Pirlo chuan, "Hmaichhanah chiang takin kan inen a, thutlukna hi kan siam a ni. Higuain hi ka ngaina em em a, mahse kawng hran zawh turin thutlukna kan siam ta a ni," a ti.

Dybala-a'n hlawh tam zawk a phut avangin chhuak tur anga sawi thawm a ri ring hman viau a, mahse Pirlo chuan a player hi a chhuah loh tur thu a sawi chiang. 

Pirlo chuan, "Dybala hi ka tan chuan player pawimawh a ni a, squad a zawm ve leh kan ruahmannaah a tel leh nghal dawn a ni," tiin Argentine forward hralh tumna an neih loh thu a sawi. 

Kum 26 mi Dybala hi season hman zawh takah khan Serie A Most Valuable Player-ah thlan a ni a, inelna hrang hrangah Juve tan match 46 khelin goal 17-a khung a, assist vawi 14-a nei bawk. 

Football transfer bazar laiin thu lengvak a tam ṭhin a, awih tur leh awih loh tur hriatthiam a harsa ṭhin. Tun hnaia chhuak tur anga sawi zingah Cristiano Ronaldo-a tel. 

Portuguese forward hi Champions League nomawi a chawi theih loh avangin Serie A club-ah a beidawng nia sawi a ni a, sum ngah Paris Saint-Germain nen sawizawm an ni. Mahse, Pirlo chuan, "Ronaldo nen inbiakna kan nei fel diam tawh a, tactic leh he team-a mawhphurhna a neih chungchangte chu kan la sawi leh ang," tiin Ronaldo chhuah loh tur thu a sawi - Ronaldo hian season hman zawh takah khan match 46 khelin goal 37-a la khung thei a, assist vawi sarih a nei bawk. 

Juve tan a khelh laia Serie A nomawi vawi li lo chawi tawhtu Pirlo hi July thla tawp khan Juventus hian Under 23 coach ni turin an lalut a, kar khat hnuah Sarri ban a nih avangin senior team a enkawl tur thu puan zui a ni. 

Pirlo chuan, "Ngaihtuahna seng tur pawhin hun ka nei lo. Thil kha a thleng chak em em a, ka pawm ve rawih a ni ber mai. Mahse, a hunah tak, a hmunah tak ka lo awm niah ka ngai a ni," a ti. Player a nih lai pawha midfielder thiam bik Pirlo chuan, "Phurna awm tur chuan hnathawh a ngai a, player-te titi pui a ngai a, kan khelh dan phung thar hriatthiam tir a ngai a ni. Club tana thawhna leh inpekna kha neih kir leh ka duh a ni," tiin a hmachhawp a sawi.