Chelsea chhuahsan tumtu Courtois

Belgium keeper Thibaut Courtois chuan a club khelh mekna Chelsea chu engtikah emaw chuan a la chhuahsan tur thu a sawi. Courtois hian 2011 khan Chelsea hi a zawm a, Blues-ah hmun pawimawh a chan phak nghal mai loh avangin season thum chhung chu loan-in Atletico Madrid-ah hun a hmang.

Kum 24-a upa keeper hi kum lamah la naupang mah se tawnhriat erawh a ngah tawh hle a, La Liga leh Premier League nomawi chawi tawhin Champions League final-ah hial inlan tawhin Europe club liante chil tiputtu a ni.

Paris Saint-Germain nena sawizawm hlawh keeper chuan, "Thil sawi har tak ni mah se Stamford Bridge-ah hian ka career ka hman zawh ka ring lo. Ka naupan lai aṭangin club ṭan bik nei lo ka ni a, awm chakna bik ka nei lo," tiin footballer dang anga club khelh chakna bik a neih loh thu a sawi.

Belgian keeper chuan sawi chhun-zawmin, "Spain-ah chuan Real Madrid leh Barcelona inkhel ka en ṭhin a, Germany-ah chuan Bayern Munich leh Borussia Dortmund ka en ṭhin. England club-ah chuan Arsenal, Manchester United leh Chelsea inkhel enin Italy-ah Juventus leh Milan inkhel en hi nuam ka ti thung. Heng club-ah hian khelh ngei ngei ka duh e, ka tihna a ni lo a, mah se hmalam hun erawh sawi lawk a harsa a ni," tiin Chelsea-ah a career hman zawh a tum loh hmel hle.