England inlan zan; Roy Hodgson-a hmalam hun hriltu?

Zanin dar 12:30-ah Eng-land-in ram tenau Iceland an hmachhawn dawn a, Roy Hod-gson-a hmalam hun hriltu tur a ni dawn - FA chairman Greg Dyke-a'n Euro zawh ruala a contract tawp tur manager hian semfinal a hruai thlen loh chuan contract thar an zawrh kher loh tur thu a sawi a, Hodgson-a chungah pressure a sang hle.

England manager hian Slova-kia an hmachhawn ṭumin player paruk a thlak danglam a, group hmahruaitu ni thei kha Slovakia an hneh zawh loh avanga pahnihna nichungin last 16 an lut a, Iceland laka an chak zo lo a nih ngat chuan sawisel tawk nasa Hodgson-a'n insawifiahna tur a ngah hle ang.

Hodgson a phang lo

England boss Roy Hodgson chuan, "England hruai zel tur in ka inbuatsaih a, FA hian he team enkawl zel tlakah min ngai lo a nih chuan an thu a ni. A nihna diktakah chuan Iceland nena kan inhmachhawn tur hian ka ngaihtuahna a ti buai lo. Iceland hmachhawn tur team kan remkhawm ang a, hnehna kan chan ngei theih nan theihtawp kan chhuah ang," tiin hnehna chan an tum tur thu a sawi.

Manager ber a zam lo a, Eng-land captain Wayne Rooney pawh a zam bik lo. Euro duhawm tak hmang mektu striker chuan, "Player panga aṭanga paruk vel thleng hi chu a mimal pawha hnehna min chanpui thei khawpa ṭha kan nei a, England squad hi tiang hi kan ni ngai lo. He hmunah hian hnehna chang turin kan lokal a, quarterfinal aia sang zawk thleng turin kan ṭha tawk a ni," a ti a, last 16 aia thui zawk a thlir.

Roy Hodgson-a'n Iceland leh Austria inkhel kha en turin a coaching staff panga a tir a, mipui 330,000 lek chenna rama player-te khelhdan an zirchiang. Austria laka chakna goal khungtu Kari Arnason-a'n Austria an hneh zawhah an inkhel entu Iceland mipui 50% chu a hmelhriat an nih thu a sawi a, ram tenau lakah England tan tlawm a thiang lo.

England hlau lo Iceland

Iceland joint-manager Heimir Hallgrimsson chuan, "Ṭum danga kan tih ṭhin ang thoa kan khelh
ṭhat chuan eng team pawh hneh thei kan ni. England-te ang team ṭha hmachhawn dawn chuan ṭha taka khelh pawn chak loh mai a awl a, mah se kan theihna zawng zawng nena khel chhuak turin kan inbuatsaih a ni. Engpawhnise, team pahnih hian chak theihna chance kan nei ve ve," tiin a zam lo.

Chelsea leh Bracelona for-ward hlui, Iceland striker Eidur Gudjohnsen chuan, "Kan theihna zawng zawng kan hmang dawn a, chu chuan quarterfinal min hruai thleng thei a nih chuan a lawmawm khawp ang. Mipuiin min beisei sang lo tih ka hria a, mah se kan theihna chu keimahni hian kan hrechiang ber a ni. Attacking game khelh ngawt a finthlak loh a, kan ṭhat theih dan bera ruahmanna siam a ṭul a ni," tiin England nena an in-hmachhawn tur a thlirlawk.

Iceland hian defensive game an khel ngei dawn niin a lang - Cristiano Ronaldo leh a hote pal darh zawh loh tlarhnung hi Ronney leh a nau ten pal darh thei tak ang maw? Zawhna chhanna chu zaninah pekin a awm dawn.

Team dinhmun

England-in group stage match thum an khelh aṭangin goal thum chiah an khung a, goal khung tuma an shot neih zat ringawt hi vawi 65 a ni a, heng zingah 15 chiah hi goal zawnah a kal - Roy Hodgson-a'n tlarhmaah tun aia ṭha zawka hmawr bawk thiam an zir a ngaih thu a sawi a, a sawi sual lo.

Iceland-in England angin goal shot ngah lo mah se vawi 21 an shot zinga vawi kua hi goal zawnah a kal thei a, England tlarhnung tan inthlahdah a thiang dawn lo. Tlarhnung lamah Iceland an rinawm a, an area-a ball kal 135 chu chhuhsak theiin vawi 96 lai an pet chhuak a, England tlarhnung tan sut hawn a harsa ang.

Tute nge inlan dawn?

England hi Slovakia hmachhawn team aṭanga an insiksawi nual a rinawm a, formation erawh Hodgson-a'n a dan pangngaiin 4-3-3 a hman rin a ni. Tottenham wingback pahnih Kyle Walker leh Danny Rose ten inkhel bul an ṭan beisei a ni a, midfield-ah a dan pangngaia Wayne Rooney awm lehin Daniel Sturridge aiah Harry Kane a luh beisei a ni a, Raheem Sterling erawh Jamie Vardy-a'n a nek chhuah chhunzawm rin a ni.

Iceland-in group stage-a an match pathumah an player ngai hlir hmangin 4-4-3 formation chu an innghahna a ni. Lars Lagerback nena Iceland enkawltu Heimir Hallgrimsson chuan player ngai hlir an hman avanga an chauh thu sawi mah se last 16 khelh dawnah an chawlh vangin an harhvang thu a sawi a, Iceland-in an starting XI ngai tho an hman a rinawm.