Chile-in Messi Argentina kawr an hlihsak. Chile an champion

Lionel Messi-a'n penalty a hlah a - Chile chuan penalty shootout-ah Argentina 4-2 a hnehin Copa America Centenario nomawi an chawi. FIFA Ballon d'Or chawimawina kawl mektu Messi hian ram tana inkhelh a chawlhsan zui nghal.

Thawhṭanni zing inkhelah Chile midfielder Marcelo Diaz leh Argentina left back Marcos Rojo ten red card an hmu a, player 10 ve ve a an khelh hnuah an nomawi kawl lai humhim turin Chile an huaisen tawk. Tlarhmaa player
ṭha rual nei chunga attacking game khel ngam lo Argentina coach Gerardo Martino hi an dem a nih pawhin a mak lo ang. Chile coach Juan Antonio Pizzi erawhin inkhelh ṭan hmain Messi leh Argentina an hneh theih tur thu a sawi lawk a, final zawhah a thusawi dikna a takin a lang.

Goal a lut lo!

MetLife Stadium-ah champion hmu chak ram pahnih fans 82,000 zet an pung khawm a, Copa America Centenario a goal khung hnem ber Argentina (18) leh an dawt chiaha awm Chile (16) ten minute 90 chhungin goal an khung lo - Extra time minute 30 an khelh hnuah pawh goal a awm loh avangin penalty shootout hmanga chak zawk zawn a ngai.

Argentina tan malpui na vanga match thum khel thei tawh lo Angel Di Maria-a'n inkhel bul a ṭan a, Paris Saint-Germain winger Di Maria hi a khelh ṭhat tawk loh vangin Atletico Madrid midfielder Matias Kranevitter chuan sesond half ṭan tirhah a rawn thlak. Hetih lai hian Chile tan hremna hmang zo midfielder Arturo Vidal a lo kir bawk. Bayern Munich midfielder Vidal erawh an champion theih nana player ṭangkai a ni thung.

Argentina coach Gerardo Martino-a'n tlar hmaaah Gonzalo Higuain mal tlat tirin Napoli striker thlawp tur hian Messi leh Di Maria te an awm bawk. Higuain hian Chile midfielder Gary Medel tih sual nang chingin ball a dawng a, goalkeeper Claudio Bravo chauh hmachhawn tawh mah se Serie A top scorer hian goal ban sirah a pet chhuak.

Minute 28-na a ni a, Diaz chuan Messi a tihtluk vangin a vawi hnih nan yellow card a hmu a, hnawh chhuah a ni. Inkhelh hmabak a la tam avangin Chile tan a pawi a, Argentina tan erawh duhthusam a ni thung. Amaherawhchu, beisei angin thil a kal vek lo. Minute 43-naah Manchester United defender Rojo chuan Vidal a tihtluk avangin Diaz hnawkchhuaktu referee Heber Lopes chuan red card a phawrh ve nghal - 10 ve ve an ni.

Nikum final-a a naute chak loh puitu Argentina coach Martino chuan goal khung tura nawr buan buan a tum lo a, a venhmin a ngai pawimawh zawk. Chile lam an fimkhur bawk avangin beisei angin inkhel a hmuhnawm lo.

Extra time-ah Manchester City striker Sergio Aguero chuan Messi siam sak a tauh lut teuh hle a, Premier League-a goal 24 khungtu Aguero ball tauh hi Barcelona keeper Bravo-a'n ropui takin a dang. Mexico laka goal li khungtu Chile star Eduardo Vargas chuan nomawi tauh chuah theihna hun nei mah se Manchester United keeper Sergio Romero a paltlang zo bik lo.

Fak phu Chile

Champion lai Chile hian an group match hmasa berah Argentina hi 2-1 in an hneh lo nghal a, hemi hnu hian an chesual nawn tawh lo. Goal 15 khung zuiin an lamah goal thum chiah a lut thung.

Copa America Centenario-ah hian Hoffenheim forward Vargas chuan goal ruk khungin top scorer a ni a, Alexis Sanchez chu 'best player' atan thlan a ni bawk. Arsenal forward Sanchez hian goal thum a khung bakah a ṭhiante goal khung tur vawi li a siamsak a - Golden Ball award dawn hi a phu.

Chile hlawhtlin nana mi pawimawh leh sawi hmaih thiang lo chu coach Juan Antonio Pizzi a ni. Kum 48-a upa Pizzi hian kumin aṭangin a hna hi a thawk ṭan chauh a, a tir lamah beisei angin result nei ṭha lo mah se hun pawimawhah a naute a fuih thiam a, a player neih a hman thiam bakah inrintawkna a siamsak thei bawk.

Tling teuh Argentina

"Champion nomawi in chawi thei lo a nih chuan lo haw suh u," tiin kum 1986 World Cup-a Argentina champion puitu Diego Maradona chuan an ram player-te chah mah se nomawi an hlawh chhuak zo ta chuang lo.

Sergio Aguero, Angel di Maria, Ever Banega, Gabriel Mercado leh Sergio Romero te hi kum 2007 khan Under 20 World Cup-ah an lo champion tawh. Tunah an vanglai an hmang mek a, Messi an neih bawk avangin team ṭha an ni.

Mahse, player ṭha awm khawm Argentina hian a tawp khar an thiam lo! 2014 FIFA World Cup final-ah khan Mario Gotze goal hmangin Germany an hneh lo a, nikum khan Copa America-ah a thlengtu Chile chu penalty shootout-ah an hneh lo bawk - kuminah pawh result a la danglam thei chuang lo. Kum 1993-a Copa America nomawi an chawi hnuah inelna lianah an la hlawhtling leh lo a, kum 23 zet an hawihil ta - Messi meuh pawhin Argentina record duhawm lo tak hi a thai chhe thei lo.

Eng nge an sawi?

Argentina coach Martino chuan, "A na a ni. Inkhelha a chak lo zawka ṭan hi chu a nain nomawi chawi lo zawk nih phei chu tawrh thiam a har hle. Thil thleng hi sawifiah thiam pawh a harsa hial," a ti.

Chile midfielder Vidal chuan hmasawn zel tur an nih thu sawiin, "Team ṭha tak nena final khelh chu a hautak hle a, mahse kan thil tum ber erawh kan ti hlawhtling thei. Tunah hian khawvela a
ṭha ber zinga mi kan ni a, thiamna hian tawp chin a neih loh avangin hmasawn zawnga kal zel tur kan ni," tiin a sawi ve bawk.

Chile coach Pizzi chuan, "Khawvela team ṭha ber ber kan hneh thei a, hlim a lawmna hun a ni. Kan huaisenna vangin rah duhawm tak kan seng a, kan player-ten fak an phu," tiin a player-ten nomawi an sual chhuah thu a sawi. Pizzi hian an khingpui Messi chu khawvela ṭha ber leh midang nena khaikhin chi loh hial a nih thu a sawi tel bawk.