MPL-ah Mala hoin Aizawl FC

MPL3 leh Second Divi-sion I League-a Aizawl FC champion-puitu K Malsawmkima hoin Aizawl FC chuan MPL5 an hmachhawn dawn a, player an insiksawi nual ang.

Mizoram aṭanga I League khel hmasa ber Aizawl FC hian an player ṭhenkhat ISL khel turin an chân mai thei a, MPL club danga chhuak eng emaw zat an awm ve bawk a, an la kawl tur chin pawh hi hrawl tak an ni.

Hriat theih chinah Aizawl FC aṭang hian an playmaker
ṭhin R Malsawmtluanga, right back Thomas Laleng-kima leh winger Lalmuanzova-te'n Chanmari FC lam an pan. Striker Michael Lalremruata'n Dinthar FC lamah a kalsan a, Chhinga Veng FC lamah Ronald Zothanzama leh H. Lalmuankima te kalin, Laldampuia pawh Chanmari West FC-ah a kal niin an sawi. An foreigner Joel Sunday, Alfred Jaryan leh Yuta Kinowaki te chu tunah chuan an chhawr zui dawn lo niin a lang bawk a, captain David Lalrinmuana'n ISL lam a pan bawk ang.

Aizawl FC hian an youth team aṭangin player an seng lut nual dawn - tunah hian central midfielder Lalawmpuia Hnamte, wing back Lalramhmunmawia, midfielder Vanlalṭhazuala, forward F. Lalremsanga te an ziak lut. Anni rual hi I League Under 18 leh ADFA first division league lama inlan tawh, an naupan aia tawnhriat nei ṭha an ni.

Hei bakah hian player thar pathum an ziak lut tawh - Lalnuntluanga an lalêt a, Zo United player Tluanga hi tun hmaa Aizawl FC-a khel reng ṭhin kha a ni a, season hmasaa hmun danga a kal hnuah a club ngaiah a kir leh. Defender pahnih an la a, Santosh Trophy-a tun hnai kum hnih chhunga Mizoram defender Lalrinzuala Khiangte chu Zo United aṭangin an ziak lut a, Chanmari FC right back rinrawl Lalhriatrenga (Achi-a) chuan a zawm fel tawh bawk.

Aizawl FC coach Mala chuan, "Kan team hi a inthlak deuh dawn a, hmel thar pawh kan nei ve nual ang. Player naupang rual kan ni deuh dawn a, kan naute hi an ṭha a, kan ring tawk a ni. Season hmasaa I League vela kan hmuh loh, kan veteran player Rohming^-thanga hmel kan hmu leh bawk ang," a ti a, Lengpui midfielder hi MPL hmasa berah best midfielder atana thlan a ni a, player tawnhriat ngah a ni.

Foreigner an lak dawn leh dawn loh zawhna chhangin Aizawl FC boss chuan, "Kan hotute'n biak mek an nei a, tuna lo sawi chi a la ni lo, Kan hlawhtling thei a nih chuan team tichak thei tur ngei kan la lut ang, he mi chin hi ka sawi theih a ni a, a bak chu kan club-in official-a puanzar tur chin chu an puang turah ka ngai," a ti.

Aizawl FC hian goalkee-per-ah Lalawmpuia leh Zothanmawia an kawl a, an chhe lo. Defender hi chhuak ve nual tawh mah se an lak tharte bakah Lalramchullova, Ricky Lallawmawma, Lalṭhakima, Jonathan Lalhriatkima, Lalruatthara-te an la nei. Heng zingah hian ISL lam aṭanga sawmna dawngte pawh an awm ngei a; nimahsela an chhuah dawn leh dawn loh a la chiang lo.

Midfielder zingah Lalbiak--thanga hi a khaipa ni thei tura ngaih a ni a, Albert Zohmingmawia leh Brandon VL Remdika-te hian I League-ah an theihna an lantir tawh. B Zoramthara leh William Lalnunfela-te an la neih avangin an goal nawr pawha na tura ngaih a ni a, foreigner sawi thawm a awm bawk avangin an chhe lo ang.

Mala chuan, "Team dang pawh kan la hre kim loa, keini pawh kan la inlak belh ve mek bawk a, tunah chuan champion leh champion loh lam sawi a la hun lo a, theihtawp chhuahin training kan kalpui mek a ni," tiin a sawi.