MFA-in referee chher hriam

All India Football Federation (AIFF) leh Mizoram Football Association (MFA) ṭangkawpin tualchhung referee-te chher hriam nan Referee Development Course vawi rukna chu nimin aṭang khan RG Stadium, Mualpuiah neih ṭan niin July 2, Inrinni thleng a awh ang.

Kum 2012 aṭangin Referee Development Course hi kum-tin neih a ni a, referee-ah hian category 5 thleng awmin Mizo-rama aṭangin category 2 thleng pha panga chiah an la awm.

Mizo referee-te tuai hriam turin AIFF-in instructor pahnih C.R Singh leh Suprya Batacharya te an rawn tir a, training hi theory leh practical-a ṭhenhran a ni.

Referee instructor C.R Singh chuan "Referee Development Course hi AIFF chuan nasa zawk a kalpui zel a tum a, tun ṭumah pawh hian tih takzetin kan bei ang. Zirlaite pawhin tihtak zeta an beih ve a ngai a, Laws of the game 2016-17 hi bel taka thiam turin kan luhchilh ang a, hmasawnna kan nei ngei tur a ni," tiin a sawi a, AIFF-in Mizoram a duhsak thu a sawi tel bawk.

Referee Development Course hawnnaa khuallian R Vanlalvena, MLA chuan "Referee Development Course-a lo kal zawng zawng te hi hlawhtling turin kan zir ang a, kan bei tur a ni. Kan ram tan chenfakawm tham ni turin tihtakzetin kan zir ang a, harsatna paltlang turin kan chhel tur a ni. International thlengin kan mizo referee-te Television-ah in hmel hmuh kan duh a, hlawhtlin ai chuan hlawhtlin loh a awl zawk avangin taimak kan chhuah leh zual tur a ni," tiin referee-te a fuih.