I chawl ang maw!

Diego Maradona leh Pele tih theih loh Copa America nomawi chawi turin Lionel Messi-a'n minu-te 120 hun a nei a - a chhawr
ṭangkai zawh loh avangin Argen-tina kawr a hlip.

Kum 29-a upa Messi hian club football-ah Maradona leh Pele te khumin record ropui chungchuang nei mah se, inelna lian thamah ram tan nomawi a la chawi lo. Hun lo taka thutlukna a siam avangin a chanchina ser lian tak hi nuai reh a ni dawn ta lo.

Ropuina rama Barcelona hruai thlengtu hi a kum enin World Cup vawi khat dang khel thei la ni mah se chawl turin tlutlukna a siam ta si, Messi - a hma lua e!

Messi chuan, "Ka tan chuan ram tana inkhelh hun chu a tawp ta! Ka theihna zawng zawng ka hlan a, champion loa chawlh hi a na hle," tiin a sawi.

Argentina captain hian Copa America Centenario-ah goal nga khungin an ram chu final thlen pui mah se final-ah Chile an ngam lo. Chak loh vanga Argentina ram mipui mittui tla chu Messi-a chawlh thu hian a belhchhah ngei ang.

Rosario, Argentina-ah June 24, 1987 khan a lo piang a - October 2004 khan kum 17 chauha upa ni chungin an ram tan a inlan ṭan. Argentina tan kum 11 a inlan chhungin match 113 khelin goal 55 a khung a, ram tana goal khung hnem ber a ni.

Footballer piang tawh zinga mi tam takin 'thiam ber' a an ngaih Messi hian Argentina tan 2008 Olympic gold medal a dawng a, tun hnai kum thum chhungin major tournament final pathumah a chak lo lamah aṭang. 2014 World Cup final-ah Germany an hneh loh bakah a kum zawnin Copa America final-ah Chile an hneh lo.

Ballon d'Or chawimawina vawi nga dawng tawhtu chuan, "Argentina champion-pui hi ka duhthusam a ni. Final vawi li ka khel tawh a, ka duh ber ka hlawh chhuak lo. Ka tan chuan a tawk tawh e," tiin ram tana inkhelh a chawlhsan tur thu a sawi.

Club inelnaah erawh Messi hi tuma el phak loha chungnung a ni. La Liga-ah ṭum riat leh Champions League-ah pawh vawi li ngawt a champion tawh.

Catalan club tan hian match 531 a khelh aṭangin goal 453 a khung tawh a, La Liga bikah chauh goal 312 khung tawhin ani aia khung tam an awm lo - a la khung belh zel pawhin a rinawm.

Ram tana Messi khelhpui Aguero chuan, "A pawi ber chu Messi-a'n penalty a pet goal lo kha a ni a, khatiang em ema a lungngai hmel kha ka la hmu ngai lo. World Cup leh Copa final-a kan chak loh hmasak ai khan kan a tuar na hle tih a lang a, Messi chauh ni lo player dang pawh an chawlh ka ring," tiin an chak lo chu tawrh thiam har an tih thu a sawi.

Argentina goalkeeper Ser-gio Romero chuan Messi-a'n Argen-tina kawr a hak tawh loh tur thu a sawi mai chu an chak loh vanga a rilru na lutuk a nih a rin thu a sawi ve bawk.

Football khawvelah hian chawlh tawh rawn let an awm fo, Messi hian a thutlukna hi sutin ropui zawkin a rawn let thei - hei erawh football ngainatute duhthusam chauh a ni.