Euro 2016 Hungary chunga leng Belgium
Belgium tan captain Eden Hazard-a'n a thiamna a pho chhuak a, group stage-a team hmuhnawm Hungary chu Euro 2016 last 16-ah an mawi zo tawh lo. Red Devils-in Toby Alderweireld, Michu Batshuayi, Hazard leh Yannick Carrasco te goal hmangin Hungary 4-0 in an sawp a, Zirtawpni zan hian quarterfinal-ah Wales an hmachhawn ang.
Belgium tak tak
Italy hneh loin Belgium-in Euro 2016-ah bul an ṭan a, champion tura rinkai kha beisei ni phak lo tura rin an ni chhunzawm. Amaherawhchu an bul ṭan
ṭhat lohna chuan rah ṭha thlenin knockout stage-ah team awlsam zawk an hmachhawn phah a, final kalkawngah FIFA World Cup chu sawi loh European Championship-a nomawi chawi tawh pawh an awm lo!
Pathianni zana Toulouse-a inkhelah Belgium an hmuh-nawm nghal, Hungary erawh last 16 boruakah an lu a hai tih a lang reng. Red Devils-in chance ṭha nghah nghalin minute 10-naah Kevin De Bruyne-a freekick chu Spurs defender Alderweireld-a'n a tauh lut.
Marc Wilmots-a nauten hun chanve hmalam inkhel an thunun tawp a, Hungary-in ṭum dang an phak loh bawk avangin kum 40-a upa keeper Gabor Kiraly-a'n buaina tur a ngah hle. Everton striker Romelu Lukaku chu goal khung lamah a vannei tawk lo a, Belgium-in De Bruyne hmangin inkhel an thunun a, Manchester City midfielder hian ball sem a thiam a, a freekick pet thiam zia hmuh tur a awm bawk.
Amaherawhchu Belgium hian first half-ah goal khat chiah an khung a, Hungary tan insiamṭhatna hun an siamah an ngaih theih. Second half-ah Hungary captain Balazs Dzsudzsak cross chu Adam Szalai-a'n goal zawnah a tauh lo hlauh a, centreback Roland Juhasz-a ball pet nalh tak chu a goal lo. Hungary hian an chance pahnih hi khung ngat se chuan Belgium hi talbuai thei an ni.
Hungary-in an siphurh sut tuma an nawr hi Belgium tan malsawmna a ni a, Hazard-a ball ṭha zet chu substitute Michu Batshuayi-a'n a luh aṭanga minute hnihna lekah a pet goal nghal. Red Devils-in an goal hnihna an khung hian minute 78 a ni tawh a, goal hnih dangin a chhunzawm bawk.
Captain Hazard-a'n a thiamna pho chhuakin minute 79-naah goal class bik a khung a, hun tawp hma hretin Radja Naing-golan through ball chu Atletico Madrid winger Carrasco chuan a khung leh bawk.
Eng nge an sawi?
Belgium coach Marc Wil-mots chuan, "Halftime-ah khan 3-0 tala hmahruai tawh tur kan ni a, kan tihsual lai chu Hungary beiseina kan siam rei lutuk kha a ni. Goal hnihna kan khung hnu lawkah goal thumna kan khung leh nghal a, amaherawhchu goal khung tura chance kan mamawh hnem lutuk erawh insiam-
ṭhat kan ngai a ni. Ka player-te dawhtheih turin ka hrilh a, training-naah pawh passing kan zir nasa. Brazil-ah khan kan khelh chhiat chhan min zawt a, tunah a chhana chu inhmu e," tiin FIFA World Cup aṭanga inzir chho zelin hma an sawn tawh thu a sawi.
Hungary boss Bernd Storck chuan, "Team ṭha tak kan hmachhawn a ni. An khelh dan kha a ropui a, hlawhtlinna an chan ngei theih nan duhsakna ka hlan bawk. Quarterfinal thleng pha lo mah ila tun inelna kan khelh dan hian hmalam hun êng tak kan nei tih a lang chiang a ni," tiin a khingpuite duhsakna a hlan.