Milan-ah Ibra a cham dawn?

Zlatan Ibrahimovic-a'n AC Milan tana a contract neih lai a hmang zo a, inremna thar an la nei rih lo. Club technical director Paolo Maldini chuan Swede striker chelh an duh thu a sawi, season tharah an chelh a nih pawhin a mak lo ang.

January thla khan Ibra hian Milan hi thla ruk chhung atan a zawm, an inremna hmasa hi chu a zo tawh. Contract an ziah danah player leh club an inrem a nih chuan season khat dang atan contract thar ziah leh theih a ni, tih a tel.

Maldini chuan, "Ibra hi kan tan player pawimawh a ni a, ani chelh hi kan thil tum lian tak a ni. Chutihrualin a chhuak ta a nih pawhin ruahmanna hrang hrang chu kan neih tel tho a ngai ve bawk.

"Tunah hian inremna neih tumin kan bei mek, kan inrem theih ngei pawh ka beisei. Kuminah pre season hun a rei dawn lo em em, hun tlemte chhung hian chinfel tur kan ngah, thil reng reng a rei lo thei ang bera kalpui a ngai ang," a ti.

Ibra hi kum 38 a mi a ni tawh a, a kum tam deuh tawh mah se a la fit ṭha tawk. Season chawhnu lamah chauh pawh Milan tan inelna hrang hrangah goal 11 a khung, club a zawm tirh khan Serie A-ah 11-na an ni, season a zawh meuh chuan parukna a nihpui.

AC Milan CEO Ivan Gazidis pawhin Ibra chungchang sawiin, "Season liam ta kha kan thlirkir a nih chuan Ibra ṭangkaina kan hmu chiang hle, player naupang tak tak kan ngah avangin a tawnhriat leh theihna hi kan mamawh," a ti, Ibra an chelh theih nen theihtawp an chhuah tur thu a sawi bawk.